168.am-ը գրում է.

Երեկ Հանրապետության հրապարակում՝ Նիկոլ Փաշինյանի հրավիրած հանրահավաքի ժամանակ, հարթակում՝ Փաշինյանի և իշխանության ներկայացուցիչների կողքին, արդեն 2-րդ անգամ «բացակայում» էր Երևանի քաղաքապետ Հայկ Մարությանը։

Նիկոլ Փաշինյանի հրավիրած նախորդ հանրահավաքին՝ փետրվարի 25-ին, Մարությանը կրկին ներկա չէր, քաղաքապետի մամուլի խոսնակն էլ մեզ հետ զրույցում պարզաբանել էր, որ քաղաքապետ Հայկ Մարությանն ամբողջ օրվա ընթացքում զբաղված է եղել իր աշխատանքային պարտավորությունները կատարելով։

168.amն այսօր կրկին դիմեց Երևանի քաղաքապետի մամուլի խոսնակ Հակոբ Կարապետյանին հարցով, թե ինչո՞վ է պայմանավորված, որ Հայկ Մարությանն արդեն 2-րդ անգամ չի մասնակցում Նիկոլ Փաշինյանի հրավիրած հանրահավաքին, ինչին Կարապետյանը պատասխանեց, որ Երևանի քաղաքապետը երեկ հրապարակում է եղել հանրահավաքի ժամանակ։

  • Այդ դեպքում ինչո՞ւ բեմ չէր բարձրացել, Նիկոլ Փաշինյանի ողջ թիմը բեմի վրա էր։
  • Երեկ Հայկ Մարությանը եղել է հրապարակում՝ հանրահավաքի մասնակիցների մեջ՝ ժողովրդի հետ։
  • Պատճառը ո՞րն է, որ բեմ չի բարձրացել, քանի որ ողջ թիմն այնտեղ էր՝ պատգամավորներ, նախարարներ, անգամ գործարար Խաչատուր Սուքիասյանն էր բեմի վրա Փաշինյանի կողքին կանգնած։
  • Ես չեմ կարող բեմում գտնվողների հետ կապված ինչ-որ բան ասել։
  • Նկատի ունեմ՝ ինչո՞վ է պայմանավորված Մարությանի բեմ չբարձրանալը, նեղացա՞ծ է թիմակիցներից։
  • Ոչ, ոչ մի անձնական խնդիր, նեղացվածության հետ կապված հիշատակումները տեղին չեն։
  • Հանրահավաքը սկսվեց Նիկոլ Փաշինյանի և իշխանական թիմի՝ կառավարության շենքից դուրս գալով, և միասին բարձրացան բեմ, նման առաջարկ եղե՞լ է Հայկ Մարությանին։
  • Ես տեղյակ չեմ՝ առաջարկությունների հետ կապված։

 

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել