Նախ ասեմ, որ շուրջ 25 տարի ծառայել եմ ՀՀ ոստիկանությունում եւ իմ տված նախկին հարցազրույցներից մեկում նշել եմ, թե ինչ կարգավիճակում էլ լինի, ես նորից անգամ առանց աշխատանքի, կծառայեմ երկրին: Այս մասին, այսօր՝ հունվարի 15-ին, ԱԺ-ում լրագրողների հետ զրույցում նշեց ՊՆ նորանշանակ փոխնախարար, նախկին ոստիկանապետ Արման Սարգսյանը՝ անդրադառնալով հարցին, թե ինչու ազատվեց ոստիկանապետի պաշտոնից եւ ինչու համաձայնեց նշանակվել պաշտպանության փոխնախարար:
«Այսինքն ինձ համար որպես սկզբունք դրված չէր, որ եթե եղել եմ ոստիկանապետը, հետեւաբար չեմ կարող լինել երկրորդ կամ երրորդ դեմք: Ես դրանում որեւէ խնդիր չեմ տեսնում: Առավելեւս այս փուլում հետպատերազմյան շրջանում ինձ համար մեծ պատիվ ու պատասխանատվություն է ծառայել ՊՆ-ում եւ իմ լուման ներդնել հայրենիքի պաշտպանության, անվտանգության գործին:
Ոստիկանության պետի եւ նշանակում, եւ պաշտոնավարումը, եւ ազատումը պայմանավորված է որպես վարչապետի ենթակայությամբ ծառայող մարմնի ղեկավար: Իմ աշխատանքի գնահատականը տվել է ՀՀ վարչապետը»:
Հարցին, թե իրեն չի՞ պարզաբանել, թե ինչու է ազատել պաշտոնից, Արման Սարգսյանն ասաց. «Եկեք այդ մասին բան չասեմ: Միգուցե իրադարձությունների համընկնում էր: Հարսանիքը չէր հաստատ: Միգուցե ինչ-որ խնդիրներ լավ չեմ լուծել, ենթադրում եմ կորոնավիրուսի հետ կապված»:
Հարցին, թե սպասելի՞ էր, որ նոր պաշտոն կստանաք, Արման Սարգսյանը պատասխանեց. «Պարզ ասեմ, որ ինձ համար սպասելի է եղել յուրաքանչյուր կարգավիճակով ծառայել հայրենիքին: Չնայած այն հանգամանքին, որ ոստիկանությունում իմ ծառայության ընթացքում մամուլը ոչ միշտ է օբյեկտիվ ներկայացրել տեղեկատվությունը, սա մեղմ եմ ասում, ավելի շատ եղել են հրապարակումներ, որոնցում իսպառ բացակայում էին իրականության հիմքերը, բայց ես որոշակի մեծ ներդրում եմ ունեցել ոստիկանության ծառայության կազմակերպման մի շարք խնդիրների լուծման առումով: Հույս ունեմ, որ ՊՆ-ում կարողանալու եմ եւ անելու եմ ամեն ինչ, գիշերուզօր ծառայելու եմ, որ օգուտ բերեմ պետությանը:
Մամուլում այնպիսի բաներ են գրվել, որ ուղղակի զավեշտից այն կողմ չեն կարող որոշակի լրջության արժանանալ: Նույնիսկ իմ ազատվելուց հետո հոդվածներ հրապարակվեցին, որոնք ծիծաղելի չասեմ, ոստիկանությունում բլորը ցավ են ապրել, որ նման ստահոդ տեղեկատվություն է եղել»: