Tert.am-ը գրում է.
Հայտարարությունը պետք է ավելի շուտ արվեր և ավելի լավ կլիներ, որ հայտարարությունն ավելի հասցեական լիներ՝ ուղղված Ադրբեջանին, որովհետև պատերազմի սանձազերծողն Ադրբեջանն է: Այս մասին Tert.am-ի հետ զրույցում ասաց ՀՅԴ ԳՄ ներկայացուցիչ Իշխան Սաղաթելյանը՝ անդրադառնալով ԵՀԿ Մինսկի խմբի համանախագահող երկների ղեկավարներ՝ Վլադիմիր Պուտինի, Էմանուել Մակրոնի և Դոնալդ Թրամփի հայտարարությանը:
Վերջինս հավելեց. «Հույս ունեմ՝ հայտարարությանը կհետևեն գործնական քայլեր»:
Հարցին՝ ինչո՞վ է պայմանավորված, որ այս հայտարարությունն էլ է անհասցե, չի ստացվում, որ հերթական անատամ հայտարարությունն է, Սաղաթելյանն ասաց. «Կարծում եմ՝ այս անգամ այդքան էլ անատամ չէ, շատ հստակ դիրքորոշում է՝ պետք է ռազմական գործողությունները դադարեցնել և առանց նախապայմանների բանակցել»:
Իսկ թե ով պետք է քայլ անի, Իշխան Սաղաթելյանն արձագանքեց, որ միանշանակ Ադրբեջանը: «Այս պատերազմը սանձազերծող կողմը Ադրբեջանն է, հասցեատերն Ադրբեջանն է: Ադրբեջանն է սկսել, նա էլ պետք է ռազմական գործողությունները դադարեցնի»,- շեշտեց նա:
Ինչ վերաբերում է թե՛ Ֆրանսիայի նախագահ Էմանուել Մակրոնի, թե՛ ռուսական կողմի հայտարարությանը, որ պատերազմին ներգրավված են սիրիացի իսլամիստները, Սաղաթելյանն ասաց. «Իրականում սա շատ կարևոր տեղեկություն է, և լավ է, որ միջազգային հանրությունը արձագանքում է այս իրավիճակին: Նաև արդեն շատ հստակ է Թուրքիայի ներգրավվածությունը պատերազմին, նույնիսկ պատերազմը ղեկավարվում է Թուրքիայի կողմից, Թուրքիան ունի իր անմիջական և ամբողջական մասնակցությունը:
Այս իմաստով միջզգային հանրությունը պետք է շատ արագ արձագանքի և դատապարտի Թուրքիայի կայսերապաշտական քաղաքականությունը»:
Հիշեցնենք, որ այսօր Ռուսաստանի նախագահ Վլադիմիր Պուտինը, ԱՄՆ-ի նախագահ Դոնալդ Թրամփը և Ֆրանսիայի նախագահ Էմանուել Մակրոնը համատեղ հայտարարությամբ են հանդես եկել Արցախադրբեջանական շփման գծում տիրող իրավիճակի մասին։
Ամբողջական հոդվածը կարող եք կարդալ այստեղ
