News.am-ը գրում է.
Կորոնավիրուսով վարակված Իտալիայի նախկին վարչապետ Սիլվիո Բեռլուսկոնին դուրս է գրվել Միլանի San Raffaele հիվանդանոցից, որտեղ նա ընդունվել էր սեպտեմբերի 3-ին, հայտնում է ՌԻԱ Նովոստին:
Հիվանդանոցից դուրս գալով՝ 83-ամյա քաղաքական գործիչը կարճ ելույթով դիմել է հավաքված աջակիցներին եւ հեռուստալրագրողներին:
«Շնորհակալություն, որ եկել եք։ Սա դարձավ իմ կյանքի ամենավտանգավոր փորձությունը»,- ասել է «Առաջ, Իտալիա» կուսակցության նախագահը:
Հինգ րոպեանոց ելույթում Բեռլուսկոնին շնորհակալություն է հայտնել իտալացի քաղաքական գործիչներին, ովքեր վարակվելուց հետո աջակցություն են հայտնել իրեն՝ նշելով, որ դա «իրեն թույլ է տվել հաղթահարել ամենադժվար պահերը, որոնք շատ-շատ էին առաջին երեք օրերին»:
«Իմ մտքերն առաջին հերթին ուղղված են COVID-ով բազմաթիվ հիվանդներին եւ նրանց ընտանիքներին: Մեզանից յուրաքանչյուրը ուրիշներին վարակելու ռիսկի է դիմում, եւ կրկին բոլորին առավելագույն անձնական եւ սոցիալական պատասխանատվության կոչ եմ անում»,- ասել է քաղաքական գործիչը:
Երկուշաբթի օրը տեղական աղբյուրները հայտնել էին, որ Բեռլուսկոնին վերականգնման մնացած ժամանակը կանցկացնի Միլանի մերձակայքում գտնվող իր առանձնատանը: Նրա անձնական բժիշկ Ալբերտո Ձանգրիլոն անցյալ շաբաթ հայտնել էր, որ վարակվելուց հետո նախկին վարչապետի մոտ թոքերի վարակի թեթեւ տեսակ է ախտորոշվել:
