News.am-ը գրում է․
Լիբանանը կորոնավիրուսի համաճարակի վերահսկողությունը կորցնելու ռիսկի է ենթարկված՝ Բեյրութում օգոստոսի 4-ի պայթյունից հետո դեպքերի աճի պատճառով: Այս մասին հայտարարել է վարչապետի պաշտոնակատար Հասան Դիաբը, հայտնում է Reuters-ը:
Բժիշկների խոսքերով՝ պայթյունից երկու շաբաթ անց դեպքերի թիվը կրկնապատկվել է, քանի որ վարակը տարածվել է այն հիվանդանոցներում, որտեղ տուժածները բուժում են ստացել։
«Դեպքերի թիվը զգալիորեն աճում է, եւ եթե դա շարունակվի, մենք կկորցնենք վերահսկողությունը այս համաճարակի վրա»,- ասվում է Դիաբի հայտարարության մեջ, որը հրապարակել է Պաշտպանության գերագույն խորհուրդը:
Օգոստոսի 26-ին Լիբանանում գրանցվել է COVID-19-ով վարակման 557 նոր դեպք եւ մեկ մահ: Նախօրեին գրանցվել էր մահվան ռեկորդային թիվ՝ 12 մարդ:
Լիբանանի ժամանակավոր կառավարության առողջապահության նախարար Համադ Հասանը հայտարարել է, որ անհրաժեշտ է բարձրացնել հիվանդանոցների կարողությունները՝ հիվանդության աճի դեմ պայքարելու համար:
Անցած ուրբաթ կառավարությունը մասնակի կարանտին էր մտցրել: Բայց սահմանափակումները, ներառյալ պարետային ժամը, դեռեւս թույլ են տալիս մաքրել աղբը, վերանորոգում կատարել եւ օգնություն ցուցաբերել պայթյունից տուժած տարածքներում:
