Հաշվի առնելով մի խումբ զինծառայողների դիմումների հիման վրա կատարված մասնագիտական ուսումնասիրությունները, Մարդու իրավունքների պաշտպանի եզրակացությունը, դատական վճիռները՝ արձանագրում ենք, որ առկա են զինծառայողների և նրանց հավասարեցված անձանց իրավունքների կոպիտ խախտումների փաստեր, օրենսդրական բացթողումներ և պաշտոնատար անձանց կողմից անփութություններ կամ դիտավորյալ չարաշահումներ:
Մտահոգված լինելով ՀՀ զինծառայողների և նրանց հավասարեցված անձանց իրավունքների պաշտպանությամբ՝ անընդունելի ենք համարում այն հանգամանքը, որ ՀՀ զինծառայողների և նրանց հավասարեցված անձանց արձակուրդայինները 2005 թվականից տրամադրվում են ՀՀ օրենսդրության կոպիտ խախտմամբ:
«Արդարություն» կուսակցությունն իր աջակցությունն է հայտնում ՀՀ պահեստազորի զինծառայողների իրավունքների պաշտպանությամբ զբաղվող նախաձեռնությանը և պահանջում է ՀՀ կառավարությունից կատարել արձակուրդային վճարումների պարտավորությունները՝ ՀՀ զինծառայողների և նրանց հավասարեցված անձանց նկատմամբ՝ ձեռնարկելով համապատասխան միջոցներ՝ թերությունները շտկելու, վերոնշյալ կոռուպցիոն շղթան բացահայտելու, ինչպես նաև մեղավորներին պատասխանատվության կանչելու հարցում:
Կոչ ենք անում ԱԺ Պաշտպանության եւ անվտանգության հարցերի մշտական հանձնաժողովին, Մարդու իրավունքների պաշտպանության եւ հանրային հարցերի մշտական հանձնաժողովին և Մարդու իրավունքների պաշտպանին կազմակերպել պահեստազորի զինծառայողների իրավունքների պաշտպանությամբ զբաղվող նախաձեռնության և այլ շահագրգիռ կազմակերպությունների հետ համատեղ լսումներ խնդրին համակարգային լուծում տալու նպատակով:
Ազգ, Հայրենիք, Պետություն, Արդարություն
«Արդարություն» կուսակցության քաղաքական խորհուրդ