Armenpress.am-ը գրում է․
Հայաստանում ավելացվում են վերակենդանացման բաժանմունքների մահճակալային տեղերը: «Արմենպրես»-ի հաղորդմամբ՝ այս մասին ասաց ՀՀ առողջապահության Արսեն Թորոսյանը պարետատան նիստից հետո առցանց ճեպազրույցում՝ պատասխանելով լրագրողի հարցին:
Լրագրողը հիշեցրել էր անկախ պատգամավոր Արման Բաբաջանյանի հայտարարությունը, որ առաջիկայում մահերը լինելու են տանը, հետաքրքրվել՝ արդյոք վերահսկողությունից դուրս է եկել իրավիճակը:
Նախ պատասխանեց ՀՀ վարչապետ Նիկոլ Փաշինյանը՝ հիշեցնելով, որ ամենօրյա աշխատանք է տարվում տարբեր բուժհաստատությունների հետ, որպեսզի վերակենդանացման տեղերն ավելացնեն:
Նախարար Թորոսյանն էլ հավելեց՝ վերջին օրերին արդեն փոքր ավելացումներ կան: «Խոսքը Արտաշատի բժշկական կենտրոնի, Օրթոպեդիայի և վնասվածքաբանության գիտական կենտրոնի մասին է: Սակայն երեք խոշոր ավելացումներ ենք ունենալու հերթականությամբ՝ Աստղիկ ԲԿ-ում՝ մոտ 20 ռեանիմացիոն մահճակալ և ևս 20 ինտենսիվ թերապիայի մահճակալ, Սուրբ Գրիգոր Լուսավորիչ ԲԿ-ում՝ մոտ 50 ռեանիմացիոն մահճակալ և Էրեբունի ԲԿ-ում՝ մոտ 45-50 ռեանիմացիոն մահճակալ»,-ասաց Թորոսյանն ու նշեց՝ գործողությունները կախված են լինելու վարակի տարածման տեմպից:
Նախարարը նաև նշեց, որ չի կիսում Բաբաջանյանի այն կարծքիը, որը շուտով մարդիկ տանը մնալու են և առանց բուժօգնության մահանալու: Այդ իրավիճակը ամենօրյա ռեժիմով գնահատվում է, ըստ այդմ՝ որոշվում է քաղաքականությունը:
Աննա Գրիգորյան
