Իսրայելում դեսպանատուն բացելու Հայաստանի ընդունած որոշմանն օրերս արձագանքել էր Իրանի իսլամական խորհրդարանի նախագահի հատուկ օգնական եւ միջազգային հարցերով գերատեսուչ Հուսեյն Ամիր Աբդոլլահիանը: Իրանցի պաշտոնատարը հայտարարել էր, որ Երեւանի այդ քայլը բացասաբար է ազդելու տարածաշրջանի անվտանգության ու կայունության վրա:
Առնվազն վերջին տարիների ընթացքում սա գրեթե առաջին անգամ է, որ իրանցի մի պաշտոնատար Հայաստանին մեղադրում է տարածաշրջանում անկայունության ու անապահովության ստեղծման մեջ:
Խնդիրը կարելի էր այնքան լուրջ չհամարել, եթե իրանցի պաշտոնատարի հիշյալ հայտարարությանը չհաջորդեին նույն կապակցությամբ իրանական ազդեցիկ շրջանակներին կապված երկու լրատվամիջոցներում Հայաստանի այդ քայլը խստորեն դատապարտող հոդվածները:
Իսլամական հեղափոխության պահապանների կորպուսին կապված «Թասնիմ» լրատվական գործակալությունը «Հայաստանի համար Սիոնիստական ռեժիմի (Իսրայել) լարած թակարդը» խորագրով հոդվածում նշելով, որ «Հայաստանում իշխանության եկած արեւմտամետ ուժերը հավանաբար հանգել են այն եզրակացության, որ Սիոնիստական ռեժիմի (Իսրայել) հետ հարաբերությունների սերտացումը կարող է ապահովել նրանց շահերն ու լուծել նրանց առջեւ ծառացած խնդիրները», հավելել է, որ ՀՀ վարչապետ Նիկոլ Փաշինյանն ընտել է նույն ուղին, որն ավելի վաղ ընտրել են նաեւ Վրաստանն ու Ադրբեջանը, ինչը հանգեցնելու է այդ երկրներում ու Հարավային Կովկասի զգայուն տարածաշրջանում Սիոնիստական ռեժիմի (Իսրայել) ներազդեցության տարածմանը: Հոդվածագիրն, ի դեպ, Հայաստանի իշխանություններին զգուշացրել է Իրանի կոշտ արձագանքի մասին: (հղումն՝ այստեղ)։
Պահպանողական թեւին մոտ գտնվող «Մեհր» լրատվական գործակալությունը նույնպես թեմային անդրադարձել է «Հայաստանի խաղը ամերիկյան-իսրայելյան փազլում» խորագրով հոդվածում: Հոդվածը, որ նախորդի համեմատությամբ ավելի խիստ հակահայկական երանգ է պարունակում, 2018 թվականի ապրիլին Հայաստանում տեղի ունեցած իշխանափոխության հարցում, ի թիվս այլ գործոնների, նաեւ ազդեցիկ է համարել երրորդ թաքուն դերակատարի միջամտությունը, որն ակնհայտորեն փորձում է հարվածել Իրանին: Հոդվածում անդրադարձել է կատարվել նաեւ Հայաստանում Իրանի քաղաքացիների բանկային հաշիվների հետ կապված խնդիրներին ու նաեւ կորոնավիրուսի տարածման լուրը հրապարակվելուն պես Իրանի հետ սահմանները փակվելուն:
Հոդվածագիրը նաեւ նշել է, որ Հայաստանն իրեն անհրաժեշտ էլեկտրաէներգիան արտադրում է Իրանից ներկրվող գազի միջոցով, եւ նկատի առնելով Իրանի դեմ Վաշինգտոնի խաղին Հայաստանի ներկա իշխանությունների մասնակցությունը՝ Իրանի իշխանություններին կոչ է արել անհապաղ համապատասխան քայլ ձեռնարկել (հղումն՝ այստեղ)։
Թել Ավիվում Հայաստանի դեսպանատուն բացելու լուրին «Թել Ավիվում դեսպան նշանակելու հրամանագրով, Հայաստանը վտանգավոր խաղի մեջ է մտնում» խորագրով մեկնաբանության մեջ նաեւ իր կայքում անդրադարձել է Իրանի պետական ռադիո-հեռուստատեսության կազմակերպության արտասահմանյան հաղորդումների հայերեն ռադիոժամին (հղումն՝ այստեղ)։
Ի դեպ, հիշյալ կայքերն ու նաեւ իրանցի պաշտոնատարը ներկայացնում են քաղաքական այն թեւը, որը հաղթեց վերջին խորհրդարանական ընտրություններում ու, ամենայն հավանականությամբ, նաեւ հաղթելու է Իրանի առաջիկա նախագահական ընտրություններում:
Իրանական կողմն այն պայմաններում է ներկա ժամանակահատվածում նման մակարդակով ու ոճով ամենակոշտ կերպով արձագանքում Իսրայելում դեսպանատուն բացելու Հայաստանի քայլին, երբ այդ մասին ՀՀ կառավարության որոշումն ընդունվել է անցած սեպտեմբերին, իսկ հունվարին աշխատանքային այցով Իսրայել ուղեւորվեց ՀՀ նախագահ Արմեն Սարգսյանը, եւ իրանական կողմը դրանց որեւէ կերպ չարձագանքեց:
Չեմ բացառում, որ իրանական կողմի կոշտ արձագանքի հիմքում ընկած են երկու կարեւոր հարցեր: Վերջին օրերին կորոնավիրուսի տարածման հետ կապված Իրանի ու Իտալիայի հանդեպ Հայաստանի իշխանությունների ընդունած բացահայտ խտրական մոտեցումը եւ Արցախի հիմնահարցի հետ կապված իրանական կողմի համար ոչ բարենպաստ լուծումը:
Հիշեցնենք, որ կորոնավիրուսի տարածումը Հայաստանում կանխելու ուղղությամբ որդեգրված քայլերի շրջանակներում ՀՀ կառավարությունը որոշում ընդունեց Իրանի ու Հայաստանի օդային ու ցամաքային սահմանները եւ վերականգնեց վիզայի ռեժիմը, ինչը որեւէ առնչություն չի կարող ունենալ վիրուսի տարածման դեմ կանխարգելիչ քայլերի հետ: Դա՝ ի տես բանի, որ Չինաստանից ու Հարավային Կորեայից հետո աշխարհում կորոնավիրուսի երրորդ գլխավոր աղբյուրը համարվող Իտալիայի ուղղությամբ թռիչքները մինչեւ վերջին պահը չչեղարկվեցին:
Ինչ վերաբերում է Արցախի հիմնահարցին, տարածաշրջանում ներկա ստատուս քվոյում ցանկացած փոփոխություն, այդ թվում՝ Իրանի հետ սահմանամերձ ազատագրված տարածքների վերադարձն իրանական կողմն իր ազգային անվտանգության դեմ ուղղված քայլ է համարում ու դրա հետ չի հաշտվելու:
