Ժնեւյան հանդիպումից մեզ հայտնի դարձան մի շարք մանրամասներ, որոնք ապացուցում են, որ 8 ժամանոց հանդիպումը իրոք բանակցություն չէր։
Մինսկի խմբի համանախագահները, կարեւորելով լիարժեք փոխըմբռնման մթնոլորտը, միեւնույն լեզվով խոսելու անհրաժեշտությունը, կողմերի միջեւ չհասկացվածության կնճիռների վերացումը եւ փաստելով, որ Հայաստանի վարչապետը բանակցային գործընթացում հաճախակի հղումներ է անում համանախագահների համար անծանոթ, անհասկանալի եւ KARGIN HAGHORDUM անունը կրող աղբյուրի վրա, խնդրել են Հայաստանի արտգործնախարարին Ժնեւյան երկօրյա հանդիպումների ընթացքում ծանոթացնել ԵԱՀԿ Մինսկի խմբին Հայաստանի վարչապետի կողմից այդքան կարեւորվող եւ հիշատակվող այդ արժեքավոր աղբյուրին։
Մեզ հայտնում են, որ KARGIN HAGHORDUM տեսանյութի դիտումն այսօր ընդհատվել 137-րդ սքեթչի վրա։
Կոնֆլիկտի կարգավորման համար այդքան մեծ կարեւրություն ունեցող, Հայաստանի նոր ղեկավարության դիրքորոշումը բացահայտող այս տեսանյութի խմբակային դիտումը շարունակվելու է վաղը։
Բանակցությունների մասին հնարավոր կլինի խոսել միայն Մինսկի խմբի համանախագահների կողմից դիտված նյութի լիարժեք ընկալումից հետո, պնդում է մեր աղբյուրը։
