168.am-ը գրում է․
168TV-ի «Ռեվյու» հաղորդման շրջանակում զրուցել ենք ԱԺ «Լուսավոր Հայաստան» խմբակցության պատգամավոր Անի Սամսոնյանի հետ
– Տիկին Սամսոնյան, Կապանում ասուլիսի ժամանակ Նիկոլ Փաշինյանը հայտարարեց, որ կիսում է Լենա Նազարյանի տեսակետը, և, որ կան քաղաքական ուժեր, որոնց գործունեության կերպը եղել է իշխանության հետ առևտուր անելը, և հիմա, նոր պայմաններում, երբ իշխանությունը մերժում է որևէ առևտուր, նրանք չեն կարողանում իրենց գտնել այս նոր իրավիճակում: Լենա Նազարյանը մասնավորապես ասել էր, որ «Լուսավոր Հայաստան» խմբակցությունն ուղղակի խցանվել է անցյալում, և խորհուրդ էր տվել ելք գտնել անցյալի ձևերից, հրաժարվել անցյալի չափանիշերից: Ի՞նչ առևտրի մասին է խոսում Նիկոլ Փաշինյանը, և ի՞նչ նկատի ուներ Լենա Նազարյանը:
– Լավ կլիներ՝ պարոն Փաշինյանը հստակեցներ՝ ո՞ր քաղաքական ուժերին է ուղղված իր խոսքը, ո՞ր ուժն է որոշել, որ պետք է ծառայություն մատուցի կամ առևտրի գնա իշխանությունների հետ, հստակ անուններ նշվեին, որպեսզի մարդկանց մոտ էլ ենթադրություններ չառաջանային: Հակառակ դեպքում՝ ես դա համարում եմ մերկապարանոց հայտարարություն: Ինչ վերաբերում է տիկին Նազարյանին, նախ՝ ես կասկածում եմ, որ այդ ելույթի խոսքերն ինքն էր գրել: Երկրորդ՝ տիկին Նազարյանին արդեն ասել ենք, որ հակառակը՝ իրենք են խցանվել 2018թ. ապրիլ-մայիս ամիսներում, չեն կարողանում դուրս գալ այդ հեղափոխական վիճակից, իրենք չեն կարողանում ցուցաբերել պետականաշինական մոտեցում, պետականամետ գաղափարները չեն կարողանում կյանքի կոչել, ժողովրդավարությունը մնացել է էմոցիոնալ մակարդակում, և հեղափոխությունն անընդհատ փորձում են օգտագործել որպես թաշկինակ՝ մարդկանց բանականությունը լռեցնելու, զգացմունքներն արթնացնելու և, ըստ այդմ՝ նաև յուրաքանչյուր կառուցողական խոսք նսեմացնելու օրինակով:
– Ասացիք, որ կասկածում եք, թե Լենա Նազարյանն է այդ տեքստի հեղինակը, ինչո՞ւ:
– Շատ ծանոթ հեղինակ է, և իսկապես կասկածում եմ, թե դրանք տիկին Նազարյանի խոսքերն են:
– Դուք ոչ վաղ անցյալում համագործակցել եք այսօրվա իշխանությունների հետ, որևէ առևտուր եղե՞լ է այդ ընթացքում:
– Մենք իշխանության հետ համագործակցել ենք հետհեղափոխական ժամանակաշրջանում, դա եղել է այն ժամանակ, երբ եղել է կոալիցիոն կառավարություն, և «Լուսավոր Հայաստանն» ունեցել է մեկ նախարար կառավարության կազմում: 2018թ. ԱԺ ընտրություններից հետո որևէ համագործակցություն չի եղել:
– Նկատի ունեմ՝ նախկին իշխանությունների հետ համագործակցե՞լ եք, երբ ընդդիմություն էիք, որ հիմա ասում են՝ անցել են այդ ժամանակները:
– Եթե համագործակցել ենք, նշանակում է՝ ՔՊ-ի հետ միասին ենք համագործակցել, որովհետև «Լուսավոր Հայաստանը», ՔՊ-ն և «Հանրապետությունը» եղել են մեկ դաշինքում: Եվ եթե մեր գործընկերները կասկածներ ունեն, ուրեմն՝ իրենք ևս համագործակցել են, միգուցե ունեն տեղեկատվություն, թող բացահայտեն այդ տեղեկատվությունը:
– Ընդդիմության նկատմամբ իշխող ուժի գործելաոճն ինչպե՞ս եք գնահատում:
– Անհանդուրժող: Անընդհատ իշխանական պատգամավորների կողմից լսում եմ այն, որ մեզ նոր ընդդիմություն, նոր արժեհամակարգով ընդդիմություն է պետք, ինչ-որ աբսուրդ հայտարարություններ, թե մեզ հեղափոխական ընդդիմություն է պետք: Մեր գործընկերները դաշտը բաժանել են սև ու սպիտակների, և նրանց հոգեբանությունը հետևյալն է՝ նախկին իշխանության հետ մրցակցելիս՝ հանդես են գալիս իբրև փրկիչ, որովհետև իրենք արել են հեղափոխություն, և նախկիններին հեռացրել, ժողովրդին փրկել են, բայց երբ մրցակցության դաշտ մտնում ենք մենք՝ նոր ընդդիմությունը՝ «Լուսավոր Հայաստանը», և սկսում ենք մրցակցել իշխանության հետ գաղափարների, փաստարկների և առողջ դատողությունների շուրջ, իշխանությունն իրեն ցուցադրում է՝ որպես զոհ, ինքը այստեղ զոհ է, փրկիչ չէ:
– Ի դեպ, ԱԺ-ի բանավեճերը հնարավոր չէ՞ թողնել ԱԺ-ում և չտեղափոխել, օրինակ՝ Ֆեյսբուք:
– Ֆեյսբուքը ևս քննարկումների հարթակ է, բայց այդ հարթակը պետք է օգտագործել միայն այն դեպքում, երբ ունես ասելիք, որը հնարավոր չէ ասել ԱԺ ամբիոնից:
– Բայց հիմնականում փոխադարձ մեղադրանքներ են հնչում թե՛ ԱԺ-ում, թե՛ ձեր ֆեյսբուքյան էջերին:
– Բնականաբար, եթե ԱԺ նախագահն ընդդիմության հետ խոսում է Ֆեյսբուքի և մուլտֆիլմերի միջոցով, սա արդեն անլրջության գագաթնակետն է: Երբեմն մտածում եմ՝ այս իշխանությունը պետությո՞ւն է կառավարում, թե՞ Ֆեյսբուք է կառավարում, որովհետև այն բոլոր գործողությունները, հայտարարությունները, որոնք պետք է ուղղված լինեն հանրությանը, իրականացվում են Ֆեյսբուքի միջոցով: Ընդ որում՝ այնքան է խորանում այդ կռիվը, որ քաղաքական խոսույթն իջնում է նվազագույն մակարդակի:
– ՍԴ նախագահ Հրայր Թովմասյանի և ԱԱԾ նախկին տնօրեն Արթուր Վանեցյանի դեմ իշխանական թևից սկսված արշավն ինչպե՞ս եք գնահատում, այս փոխադարձ մեղադրանքների ու սպառնալիքների մթնոլորտը ինչի՞ կարող է հանգեցնել:
– Արթուր Վանեցյանին ստեղծել է իշխանությունը, թող իշխանությունն էլ լուծի նրա հարցերը, եթե անհրաժեշտ է գտնում: Համենայնդեպս, վերջերս տեղի ունեցան հեղաշրջման մասին հայտարարություններ, հետո պարոն Փաշինյանը փորձեց դա այլ կերպ ներկայացնել, որ՝ ուղիղ իմաստով մի հասկացեք, բայց բոլոր դեպքերում պետք է մեր գործընկերները պատասխանատու լինեն իրենց խոսքի նկատմամբ: Ինչ վերաբերում է Հրայր Թովմասյանին, մենք այստեղ մտահոգություններ ունենք այն առումով, որ խախտվում է ՍԴ-ի մասին օրենքի դրույթն առ այն, որ դատավորի նկատմամբ քրեական հետապնդման բոլոր գործողությունները հնարավորինս գաղտնիության պայմաններում լինեն, որպեսզի պահպանվի դատարանի՝ որպես ինստիտուտի, հեղինակությունը: Բայց այսօր տեսնում ենք, որ չի պահպանվում ոչ միայն դատավորի, այլև՝ դատարանի՝ որպես ինտիտուտի, հեղինակությունը, վարկաբեկվում է բոլոր միջոցներով:
Մանրամասները՝ 168TV-ի տեսանյութում
