Tert.am-ը գրում է.
ՀՀ վարչապետ Նիկոլ Փաշինյանը շարունակում է մամուլի ասուլիսը՝ ներկայացնելով 100 փաստ կառավարության աշխատանքներից:
Փաստ համար 61
Շրջակա միջավայրի նախարարությունը մեկնարկել է 2.5 մլն դոլար արժողությամբ նոր միջազգային դրամաշնորհային ծրագիր, որը կիրականացվի «Խոսրովի անտառ» պետական արգելոցի և «Դիլիջան» ազգային պարկի հարակից Դիլիջան, Ֆիոլետովո, Մարգահովիտ և Ուրցաձոր համայնքներում:
Փաստ համար 62
2018թ. 2017-ի համեմատ փայտածուխի ներկրումը Հայաստան աճել է 6,2 անգամ՝ ավելի քան 500 տոկոսով:
Փաստ համար 63
2019 օգոստոս-դեկտեմբեր ամիսներին հավաքվել է շուրջ 21 հազար լքված մեքենայի կմախք:
Փաստ համար 64
Հատուկ քննչական ծառայության 2019թ. գործունեության ընթացքում վերականգնված գումարը կազմել է 4 միլիարդ 331 միլիոն դրամ:
Փաստ համար 65
ՊԵԿ իրավական գործառույթի իրականացման արդյունքում 2019թ. պետական բյուջե է գանձվել 50,9 միլիարդ դրամ, որը նախորդ տարվա ցուցանիշը գերազանցում է 60 տոկոսով: Սա թաքցված հարկերի հայտնաբերման գործընթացն է:
Փաստ համար 66
Բացահայտվել են օտարերկրացիների կողմից ՀՀ օրենսդրության կոպիտ խախտմամբ բազմաթիվ երեխաների որդեգրման դեպքեր: Ըստ ձեռք բերված փաստական տվյալների ՀՀ 2 քաղաքացիներ, օգտագործելով իրենց կապերը մանկաբարձական հաստատություններից մեկում, մի շարք գերատեսչություններում, ինչպես նաև մանկատներում, ՀՀ օրենսդրության կոպիտ խախտմամբ կազմակերպել են Հայաստանի քաղաքացի հանդիսացող 3 տասնյակից ավելի երեխաների ապօրինի որդեգրում օտարերկրյա քաղաքացիների կողմից:
Փաստ համար 67
Վերջին 2 տարվա ընթացքում պետական և համայնքային բյուջեից ֆինանսավորվող հաստատություններում գրանցված, սակայն աշխատանքի չհաճախած կամ փաստացի աշխատանք չկատարած աշխատողների և նրանց անվամբ ձևակերպված աշխատավարձերի արձանագրված հափշտակության կամ կոռուպցիոն այլ դեպքերի վերաբերյալ իրավասու մարմինների վարույթում հարուցվել է 254 քրեական գործ, որից 129-ը վերաբերել են կրթական հաստատություններում գրանցված աշխատողներին: Հարուցված քրեական գործերով բացահայտվել են 543 գրանցված, սակայն աշխատանքի չհաճախած կամ փաստացի աշխատանք չկատարած անձինք, նրանցից 222-ը հանդիսացել են կրթական հաստատություններում գրանցված աշխատողներ:
Փաստ համար 68
2019թ. հոկտեմբերից «Նուբարաշեն» և «Արմավիր» քրեակատարողական հիմնարկներում սկսվել է այնտեղ պահվող անձանց սննդով ապահովելու գործառույթը մասնավոր ընկերությանը պատվիրակելու փորձնական ծրագիրը: Սննդից օգտվող դատապարտյալների ու կալանավորված անձանց ցուցանիշը 100% է, և դրա հետևողական կենսագործումը կնպաստի հանձնուքների թվի կրճատմանը, իր հերթին բերելով քրեակատարողական հիմնարկներում պահվող անձանց ընտանիքների՝ այս առումով հոգսի թեթևացում: «Դատապարտյալները սովորաբար ճաշարաններում հաց չեն ուտում, քանի որ պիտանի չեն ուտելու համար, երբ ասվում է թե 100 տոկոս ցուցանիշ ապահովում է, դա նշանակում է, որ սնունդը այնքան լավն է, որ օգտվում են»,-ասաց նա:
Փաստ համար 69
2020թ. հունվարի 1-ից գործարկվել է ճանապարհային երթևեկության կանոնակարգման բալային համակարգը:
Փաստ համար 70
2019թ. երեք եռամսյակի տվյալներով Հայաստանում բնական գազի փոխադրման և բաշխման համակարգերում, ինչպես նաև էլեկտրաէներգիայի մատակարարման բարձր լարման և բաշխիչ ցանցերում արձանագրվել է կորուստների մակարդակի էական նվազում: «էն որ Ազգային ժողովում ասում էի գազ են կաչատ անում, սա էլ այդ քննադատության կոնկրետ արտահայտությունն է»,-ասաց Փաշինյանը: