Լոզանի Դաշնային պոլիտեխնիկական դպրոցի գիտնականներն ախորժակը վերահսկող գեներ են հայտնաբերել: Նրանց հետազոտության արդյունքները հրապարակել է Nature Metabolism գիտական ամսագիրը:
Շվեյցարացի գիտնականները, Բարտ Դեպլանկեի գլխավորությամբ, ուսումնասիրել են պտղաճանճերի միտոխոնդրիալ ԴՆԹ-ն: Նախկինում գիտնականները հիմնականում կենտրոնացած էին բջջի միջուկի գենետիկական տարբերակների վրա:
Գիտնականները դրոզոֆիլների միտոխոնդրիալ ԴՆԹ-ի 231 տարբերակ են դիտարկել: Հետևելով արտաքին նշանների հետ դրանց կապին՝ գիտնականները հայտնաբերել են սնվելու վարքի, նյութափոխանակության և նույնիսկ սթրեսի մակարդակի համար պատասխանատու գեները:
Մասնագետները պարզել են ԴՆԹ տարբերակների 12 խմբերը, որոնք միշտ միասին են ժառանգվում: Պարզվել է, որ դրանք կապված են ոչ միայն ժառանգական հիվանդությունների, այլև սովորությունների հետ:
Գիտնականները «շատակեր» պտղաճանճերի միտոքոնդրիալ գենոմը փոխպատվաստել են ավելի քչակերներին, ինչից հետո վերջինների սնվելու վարքը փոխվել է: