Pastinfo.am-ը գրում է․
Վերաքննիչ քրեական դատարանի դատավոր Արշակ Վարդանյանն առանց քննության թողել Ռոբերտ Քոչարյանի պաշտպան Արամ Վարդևանյանի բողոքը ՝ նշելով, որ Երևանի ընդհանուր իրավասության դատարանի վիճարկվող որոշումը վերաքննության կարգով անմիջական բողոքարկման ենթակա չէ։
Նշենք, որ Արամ Վարդևանյանը նոյեմբերի 27-ին բողոք է ներկայացրել Վերաքննիչ դատարան՝ պահանջելով ամբողջությամբ կամ մասնակի բեկանել Երևանի ընդհանուր իրավասության դատարանի դատավոր Աննա Դանիբեկյանի ինքնաբացարկի միջնորդությունը մերժելու մասին դատարանի նոյեմբերի 12-ի որոշումը եւ այն ուղարկել նոր քննության կամ ըստ անհրաժեշտության կայացնել նոր դատական ակտ։
Փաստաբանը վերաքննիչ բողոքում նշել է, որ դատարանն անուշադրության է մատնել ինքնաբացարկի միջնորդության մեջ վկայակոչված փաստական մի շարք հանգամանքներ և փաստարկներ, ուշադրությունը կենտրոնացրել է միայն այն հարցի վրա, թե ինչու է իր քննած մեկ այլ, թիվ ԵԴ/0088/01/16 քրեական գործով թույլատրելի համարել գրավը, իսկ սույն գործով իրենց վստահորդի նկատմամբ՝ ոչ: «Մինչդեռ կարևոր է ընդգծել, որ ներկայացված դիտարկումն արվել էր ոչ թե միայն Դատարանի կանխակալ մոտեցումն ապացուցելու, այլ տարբերակված մոտեցումը և անհամաչափ, անհավասար պայմանների նախատեսումն առավել ընդգծելու նկատառումներից ելնելով, քանի որ դատարանը չի կարող մեկ դեպքում դիտարկել հիմնավոր ՀՀ վճռաբեկ դատարանի նախադեպից ամբողջությամբ շեղվելը և ՄԻԵԴ նախադեպով ղեկավարվելը, իսկ մյուս դեպքում՝ ոչ։ Դատարանը չի կարող մեկ դեպքում հղում անել Դ.Վարդանյանի նախադեպի վրա և դրա ՀՀ Սահմանադրության հակասող և անվավեր ճանաչվելուց հետո կրկին հղում տալ այդ նախադեպով արտահայտված դիրքորոշմանը»,- նշել է Ա.Վարդեւանյանը եւ ավելացրել. «նկարագրված իրավիճակում՝ նման անհիմն և չպատճառաբանված որոշման կայացման պայմաններում իմաստազուրկ է ակնկալել արդար դատաքննության ապահովման, մեր վստահորդի իրավունքների և օրինական շահերի պաշտպանության որևէ ողջամիտ երաշխիքների մասին, որպիսի պայմաններում պարզապես անհրաժեշտ է դառնում սույն հարցի քննարկումը վերադաս դատական ատյաններում»:
Ա.Վարդեւանյանի գնահատմամբ՝ դատավոր Աննա Դանիբեկյանի որոշումը հիմնովին խախտում է օրենքի առջև հավասարության հիմնարար սկզբունքը, որպիսի պայմաններում կրկին անգամ հանգում ենք այն եզրահանգման, որ դատական ակտը ենթակա է բեկանման»:
Սույն բողոքի քննությունը դեկտեմբերի 4-ին մակագրվել էր վերաքննիչ քրեական դատարանի դատավոր Արշակ Վարդանյանին, ով դեկտեմբերի 9-ին որոշել է այն թողնել առանց քննության։
Հիշեցնենք, որ նոյեմբերի 12-ին դատարանը մերժել է ՀՀ 2-րդ նախագահ Ռոբերտ Քոչարյանի պաշտպան Խուդոյանի միջնորդությունը՝ նախագահող դատավոր Աննա Դանիբեկյանին ինքնաբացարկի մասին: Հովհաննես Խուդոյանը նշել էր, որ նիստը նախագահող դատավոր Աննա Դանիբեկյանը չի առաջնորդվում ո՛չ ՄԻԵԴ, ո՛չ ՀՀ Սահմանադրական դատարանի վերաբերելի նախադեպերով, սակայն նախկինում իր պրակտիկայում կիրառել է դրանք։ Ավելին, խափանման միջոցի փոփոխման վերաբերյալ ոչ մի որոշում չի արժանանում պատշաճ պատճառաբանության և գործի փաստական հանգամանքների հետ համադրման, հիմնվում է մեջբերված նորմատիվային կարգավորումների վրա, որոնք որևէ կերպ չեն համընկնում և չեն արտահայտում որոշումների եզրափակիչ մասերում շարադրված դիրքորոշումներին։ Պաշտպանն ընդգծել էր, որ դատավոր Դանիբեկյանը կանխակալ բացասական վերաբերմունք ունի տվյալ գործի և, մասնավորապես, Ռոբերտ Քոչարյանի նկատմամբ։
