ՄԱԿ-ի գլխավոր քարտուղար Անտոնիո Գութերեշը Մադրիդում ՄԱԿ-ի Կլիմայի հարցերով խորհրդաժողովում նախանշել է մոլորակը փրկելու քայլերը՝ հայտնում է ՄԱԿ-ի նորությունների կենտրոնը:

Մասնավորապես, ըստ Գութերեշի, մինչև 2030 թվականը անհրաժեշտ է ջերմոցային գազերի արտանետումները 45%-ով կրճատել: Մինչև 2050 թվականը անհրաժեշտ է հասնել ածխածնային չեզոքության: Իսկ մինչև 2100 թվականը գլոբալ ջերմաստիճանի բարձրացումը սահմանափակել մինչև 1,5 աստիճան՝ ըստ Ցելսուսի:

ՄԱԿ-ի գլխավոր քարտուղարի կարծիքով՝ աղետից խուսափելու համար «հանածո վառելիքները հավերժ պետք է մնան այնտեղ, որտեղ պետք է լինեն՝ գետնի տակ»:

«Եթե մենք չազատվենք ածուխից կախվածությունից, ապա կլիմայի փոփոխությունները զսպելու մեր բոլոր փորձերը դատապարտված կլինեն ձախողման»,- նախազգուշացրել է գլխավոր քարտուղարը:

Նա նաև հավելել է, որ շատ երկրներ, ընկերություններ, ֆինանսական հաստատություններ հուսադրող քայլեր են ձեռնարկում: Բայց, ըստ Գութերեշի, փոփոխությունը տեղի է ունենում շատ դանդաղ, մինչդեռ արմատական վերակազմավորում է անհրաժեշտ: Եվ, առաջին հերթին, G-20 երկրները, որոնք կազմում են ջերմոցային գազերի համաշխարհային արտանետումների երեք քառորդը, պետք է վերակառուցվեն:

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել