Հարավային Ավստրալիայից երկու ընկերներ պատահաբար երկու անգամ ջեքփոթ են շահել, հաղորդում է Daily Mail-ը:
Երկու տղամարդիկ, որոնք միասին էին աշխատում, տարիներ շարունակ վիճակախաղի են մասնակցել: Տղամարդիկ հերթով տոմսեր են գնել՝ շահումը հավասարապես բաժանելու պայմանով:
Վերջին անգամ ընկերները շփոթել են իրենց տոմս գնելու հերթը, և երկուսն էլ միաժամանակ վիճակախաղի տոմս են գնել: Երջանիկ պատահականությամբ հենց նրանց թվային համադրությունն է ջեք փոթ շահել:
Քանի որ ընկերները նույն համարներով տոմսեր էին գնել՝ նրանցից յուրաքանչյուրը 1.67 միլիոն ավստրալական դոլար կստանա:
Հաղթողներն իրավիճակը հումորով են մեկնաբանել: Նրանք նշել են, որ եթե մարդիկ անձամբ ճանաչեին իրենց, ապա կհասկանային, որ «շատ ավելի հավանական սցենարն այն է, որ իրենց համարները հանվեր թմբուկից, երբ նրանք մոռացել էին վիճակախաղի տոմս գնել»:
Վիճակախաղի հաղթողները ծրագրում են լքել աշխատանքը և հանգստանալ:
