168․am-ը գրում է․

Այս տարվա օգոստոսի 5-ին ՀՀ վարչապետ Նիկոլ Փաշինյանը հայտարարեց՝ «Արցախը Հայաստան է, և վերջ»։ Այս հայտարարությամբ Նիկոլ Փաշինյանը, հավանաբար, ուզում էր ցույց տալ՝ ես եմ ձեր ընդհանուր ղեկավարը կամ տերը, բայց, պետք է ասեմ, որ Փաշինյանը չարաչար սխալվել է։ Այս մասին այսօր Արցախում հրավիրված մամուլի ասուլիսի ժամանակ հայտարարեց Արցախի Անվտանգության խորհրդի նախկին քարտուղար Վիտալի Բալասանյանը։

Նրա խոսքով՝ քաղաքականության մեջ Փաշինյանի ասածն անթույլատրելի է, իսկ դա ՀՀ վարչապետը, ըստ նրա՝ միտումնավոր է ասել։

«Դա շատ վտանգավոր է, կանխամտածված է ասել, որովհետև իր այդ հայտարարությանը հաջորդեց Գյումրիի դեպքը, երբ Բակո Սահակյանը գտնվում էր Գյումրիում, և ինչ-որ մեկը տրիբունայից ասում է՝ Արցախի մարզպետ»,- ասաց նա։

Արցախի Անվտանգության խորհրդի նախկին քարտուղարը շեշտեց, որ հետևելով Նիկոլ Փաշինյանի քաղաքականությանը՝ համոզվում է. «Այն քաղաքանությունը, որը այս պահին վարում է Նիկոլ Փաշինյանը, այն փաթեթն է, որը Լևոն Տեր-Պետրոսյանն ուզում էր կյանքի կոչել»։

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել