168.am-ը գրում է.

Եվրասիական տնտեսական բարձրագույն խորհրդի երևանյան նիստին Իրանի նախագահ Հասան Ռուհանիի մասնակցությունը քաղաքագետներն ու փորձագետները որակեցին կարևոր՝ թե՛ Հայաստան-Իրան երկկողմ հարաբերությունների զարգացման տեսանկյունից, թե՛ ԵԱՏՄ-Իրան հարաբերությունների համատեքստում նոր հնարավորությունների: Ի դեպ, այս այցը կարևորվեց՝ նաև հաշվի առնելով Իրան-ամերիկյան հարաբերությունների լարվածությունը:

Ի դեպ, սա Ռուհանիի երկրորդ այցն էր Հայաստան. ՀՀ երրորդ նախագահ Սերժ Սարգսյանի հրավերով 2016 թվականին ԻԻՀ նախագահը պաշտոնական այցով արդեն եղել էր Հայաստանում:

Այս այցը հարաբերությունների մեկնա՞րկ կարելի է համարել, թե՞ շարունակություն 168.am-ի հարցին ի պատասխան՝ իրանագետ Վարդան Ոսկանյանն ասաց.

«Ընդհանուր առմամբ, պետք է ասել, որ շարունակություն էր հայ-իրանական հարաբերությունների համատեքստում և, մասնակիորեն՝ ԵԱՏՄ-Իրան հարաբերությունների համատեքստում, որովհետև Իրանի և ԵԱՏՄ միջև ազատ առևտրի համաձայնագրի կնքման գործընթացը սկսվել է նախորդ իշխանությունների օրոք, և ավարտին է հասցվել ներկա իշխանությունների օրոք»:

Իրանագետը այցի կարևոր կողմերից համարեց իրանական շուկաների հասանելիությունը հայ արտադրողների համար, այդուհանդերձ նկատեց, որ առավել մեծ շեշտադրում պետք է կատարվեր հայ-իրանական երկկողմ հարաբերությունների զարգացման վրա.

«Ակնհայտ է, որ այցի կարևոր կողմերից է իրանական շուկաների բացվելը, այդ թվում՝ հայ արտադրողների համար բազմաթիվ ոլորտներում: Կարծում եմ՝ այցի ընթացքում ավելի մեծ շեշտադրում պետք է կատարվեր Հայաստանի և Իրանի միջև նաև երկկողմ հարաբերությունների զարգացմանը, մասնավորապես՝ տրանսպորտային ոլորտում շատ կարևոր է, որպեսզի Հայաստանը դառնա Պարսից ծոցը Սև ծովին կապող միջանցքի օղակ ՝ երկու բաղադրիչներով. Հյուսիս-Հարավ ավտոմայրուղով, և նաև պետք է անպայման օրակարգում պահվի Հայաստան-Իրան երկաթուղու հարցը:

Եվ էներգետիկ ոլորտում մենք չպետք է բավարարվենք «Գազ՝ էլեկտրաէներգիայի դիմաց» գործարքով. պետք է փորձել Իրանի հետ սկսել աշխատանքներ՝ իրանական գազը հետագայում տարանցելու համար՝ նաև այս գործընթացին մասնակցային ներկայություն ապահովելով ՌԴ-ի համար, որը մեր ռազմավարական գործընկերն է»:

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել