168.am-ը գրում է․
ՀՀ պաշտպանության նախարար Դավիթ Տոնոյանը սեպտեմբերի 24-ին լրագրողների հետ զրույցում հայտարարել էր, թե գեներալ Մանվել Գրիգորյանի վիճակն իրեն անհանգստացնում է: Նա մասնավորապես ասել էր.
«Ես մտահոգություն ունեմ՝ իմ զինակցի վիճակի հետ կապված։ Գեներալ Մանվել Գրիգորյանի այսօրվա կարգավիճակը շատ մտահոգիչ է անձամբ ինձ համար և բոլոր երկրապահների համար»:
Մանվել Գրիգորյանի պաշտպան Լևոն Բաղդասարյանը 168.am-ի հետ զրույցում Դ. Տոնոյանի հայտարարության առնչությամբ ասաց.
«Անձի առողջությունը, կարծում եմ, բոլորին անհանգստանալու տեղիք կարող է տալ: Ըստ էության, նորմալ եմ դիտում, որ բարձրաձայնվել է: Մենք սպասում ենք միջգերատեսչական հանձնաժողովի որոշմանը, սակայն յուրաքանչյուր դատական նիստին մենք բարձրաձայնում ենք, որ անձի նկատմամբ խոշտանգում է կիրառվում, քանի որ անօրինական կալանքի տակ է, և բոլոր այդ բարձրաձայնված նյութերն ուղարկում ենք Մարդու իրավունքների եվրոպական դատարան: Անձի նկատմամբ անօրինականությունը տևական չի կարող լինել: Հայաստանի Հանրապետությունը որդեգրել է, որ արդարադատություն պետք է տեղի ունենա ու բոլորի նկատմամբ հավասար պետք է լինի, և ընտրովի արդարադատությունը Հայաստանում պետք է տեղ չունենա»:
Անի Կարապետյան
