168.am-ը գրում է.
ԱԺ նախկին պատգամավոր, ՀՀԿ անդամ Կարինե Աճեմյանը լրագրողների հետ զրույցում ասաց, որ ԱԺ իշխանական «Իմ քայլը» խմբակցության պատգամավորների մեծ մասը լծվել է «Ստամբուլյան կոնվենցիայի» վավերացման գործին։
«Հասկանում եմ, որ մի շարք հասարակական կազմակերպություններ, պատգամավորներ տարբեր շահեր ունեն, տարբեր կողմերից ֆինանսավորվում են: Նույնիսկ լսել եմ, որ ադրբեջանական ֆոնդերից ֆինանսավորողներ կան: Այսինքն՝ մենք ծախում ենք մեր երկիրը: Հիմա ինքը չի ուզում դա անել, ուրեմն թող ստորագրությունը հետ վերցնի, ոչ թե վավերացնի: Իսկ ինքը հող է նախապատրաստում, Սոցապն այսօր գիշերօթիկներ է փակում, աջակցության կենտրոններ է բացում, այդ երեխաներին բախտի քմահաճույքին է հանձնում, պետությունը որևէ պատասխանատվություն չի կրելու նրանց հանդեպ: Իհարկե, խառնաշփոթ է նաև իր մոտ, և ես կարծում եմ, որ շատ լավ գիտի, թե ինչ է անում. կան թիրախներ, որոնք ընտրված են, և ինքն այդ ուղղությամբ աշխատում է: Անվերջ խոսում է կոռուպցիայի մասին… ես գիտեմ պատգամավորներ, ովքեր 8 ամսվա պատգամավոր են, բայց մեծ տարածքներ են գնել, ռեստորաններ են սարքում: Բա հարց չի՞ առաջանում, թե ո՞նց այսքան արագ հարստացան»,- հավելեց ՀՀԿ անդամը:
168.am-ի հարցին՝ անուններ կա՞ն, ովքե՞ր են տարածքներ գնող այդ պատգամավորները, Կարինե Աճեմյանը պատասխանեց.
«Անուններ չեմ նշի, որովհետև ես այստեղից-այնտեղից լսում եմ, բայց չեմ կարծում, որ դրանք պարզապես խոսակցություններ են: Դուք տեսաք, որ 6 ամսվա պատգամավորուհին գումար էր ստացել Ազգային ժողովից՝ խալիներ լվանալու համար: Մերոնցից ոչ մեկի մտքով չէր անցնի բյուջեից փող վերցնել, խալի լվալ ու դա վերածել ինչ-որ տոնի: Դրանք մարդիկ էին, ովքեր մեծ-մեծ խոսում էին բյուջեի թալանի մասին: Ես մշտապես ասել եմ, որ հասարակությունն է հիվանդ… եթե ուզում եք իմանալ՝ այս 30 տարիների ընթացքում այսպիսի անմեղսունակ ոչ պառլամենտ ենք ունեցել, ոչ էլ իշխանություններ: Ժամանակի ընթացքում մենք կադրերի բանկ ենք ձևավորել, հրաշալի կադրեր ենք ունեցել, և այսօր խոսել հների մասին, բայց ունենալ մարդիկ, ովքեր նախկիններից են, և միայն իրենք են այսօր պրոֆեսիոնալ աշխատանք տանում նույնիսկ այս իրավիճակում, սա զավեշտ է: Իրենց էլ հանի, փողոցից մեկին բեր, ինչ կասես՝ ինքն էլ կանի, և երկիրը վերածեք ծիծաղելի վայրի: Այսքան մարտահրավերների դեպքում, կարծում եմ, որ մենք կարող ենք ամեն ինչ կորցնել»:
Հարցին՝ այսինքն, ադրբեջանական ֆոնդերից ֆինանսավորվողների անուննե՞ր էլ չեք տալու, ՀՀԿ անդամը նշեց.
«Ինքներդ կարող եք պարզել: Այն հասարակական կազմակերպությունները, որոնք զբաղվում են այդ հարցով, կարող եք բացել ու պարզել: Այնպես չէ, որ մեծ գաղտնիք եմ ասում: Մեծ հաշվով, ինձ թվում է՝ երկիրը քանդելու ամբողջ ֆինանսավորումը գալիս է հենց այդտեղից՝ «Սորոսի» գրասենյակ, արևմտյան կառույցներ… իրենք, հնարավոր է՝ պարզապես միջնորդ են»:
