Միացյալ Նահանգներում անցկացվում է «Էմմի» 71-րդ մրցանակաբաշխության արարողությունը: «Լավագույն վավերագրական ֆիլմ» անվանակարգում մրցանակը ստացել է Մայքլ Ջեքսոնի մասին «Լքելով Նեվերլենդը» ֆիլմը:
Ռեժիսոր Դեն Ռիդի չորս ժամանոց ժապավենը հիմնված է Ջեյմս Սեյֆչակի և Ուեյդ Ռոբսոնի ցուցմունքների վրա այն մասին, որ նրանք մանկության տարիներին սեռական բռնության են ենթարկվել Մայքլ Ջեքսոնի կողմից:
Փոփ արքայի ընտանիքն ու երկրպագուները վրդովված են սկանդալային ֆիլմին մրցանակ շնորհելու փաստից:
«Մայքլի կողմից կատարված հանցագործության վերաբերյալ որևէ ապացույց չկա, ժապավենը բացարձակապես միակողմանի է: Այսպես կոչված վավերագրական ֆիլմը նկարահանվել է գաղտնի: Ոչ ոք, բացի երկու գլխավոր հերոսներից և նրանց ընտանիքներից, չի մասնակցել դրա ստեղծմանը»,- ասել է Ջեքսոնի ընտանիքի փաստաբանը:
Ռեժիսոր Դեն Ռիդը, այնուամենայնիվ, չի կասկածում Սեյֆչակի և Ռոբսոնի բացահայտումների ճշմարտացիությանը: Մրցանակը ստանալուց հետո նա Ջեյմսին և Ուեյդին շնորհակալություն է հայտնել քաջության համար:
«Լքելով Նեվերլենդը» ֆիլմի հրապարակումից հետո Մայքլ Ջեքսոնի ընտանիքը դատի է տվել HBO-ին զրպարտության համար:
