Տեղի-անտեղի ինքնիշխանությունից խոսող և ինքնիշխանություն ճոճող իշխանությունը կարո՞ղ է բացատրել, թե Տորոնտոյում (Կանադա) կայացած Հայաստանում պետական հեղաշրջման մասին ֆիլմի պրեմիերային ի՞նչ էր անում ՀՀ-ում ԱՄՆ նախկին դեսպան Ռիչարդ Միլզը (նկարում` ձախից առաջինը): Հարց է, չէ՞, առաջանում. ինքնիշխանների կողքն ի՞նչ գործ ունի այլ պետության բարձրաստիճան դիվանագետը: Իսկ եթե ընկերական շարժառիթներով էր ֆիլմի դիտմանը ներկայացել, կարելի՞ է իմանալ` ո՞ւմ ընկերն է դեսպան Միլզը` Աննա Հակոբյանի՞, Սերժ Թանկյանի՞, թե՞ Րաֆֆի Հովհաննիսյանի, և այդ ե՞րբ են հասցրել այդչափ շփվել ու ընկերանալ, գաղափարակիցներ դառնալ, որ հեղաշրջման մասին ֆիլմը միասին են դիտում: Իսկ միգուցե դեսպան Միլզը ներկա էր, որովհետև Հայաստանում իր դիվանագիտական ծառայության ընթացքում տեղի ունեցած պետական հեղաշրջմանն ակտիվ մասնակցություն ունե՞ր` ի հակառակ մամուլում և փորձագիտական դաշտում առկա բազմաթիվ պնդումների, որ 2018-ի հեղաշրջումն արտաքին շահառուներ ուներ, և դրանց մասին Նիկոլ Փաշինյանի բազմաթիվ հերքումների:

Կարո՞ղ է՝ սա կուրատորի հանդիպում էր իր ցանցի հետ: Ամեն դեպքում, Հայաստանի ներկայիս ինքնիշխանները պարտավոր են այս հարցին հստակ պատասխան տալ: Նաև խիստ ցանկալի է, որ պատասխանեն` արդյո՞ք Աննա Հակոբյանը Սերժ Թանկյանին չի զգուշացրել, որ նա անլրջացնում է 2018-ի պետական հեղաշրջման համաշխարհային ընկալումը, որովհետև Սերժ Թանկյանի տրամաչափի համաշխարհային աստղը մինչև հիմա չի կատարել վարչապետ Փաշինյանին տրված իր խոստումը` բնակարան գնել և ավելի շատ ժամանակ անցկացնել Հայաստանում:

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել