Ավստրալական Qantas ավիաընկերության ինքնաթիռը, որը Սիդնեյից Կանբերա էր ուղևորվում, կես ճանապարհից վերադարձել է ինքնաթիռում վիճաբանող ուղևորների պատճառով։ Այս մասին հաղորդում է The Independent պարբերականը։

Ականատեսների խոսքերով՝ թռիչքի ընթացքում երկու ուղևոր սկսել են վիճել. նրանցից մեկը հրաժարվել է անջատել հեռախոսը մյուսի խնդրանքով։ Դրանից հետո դիտողություն արած տղամարդը խլել է համառ ուղևորի հեռախոսը և նրանց միջև ծեծկռտուք է սկսվել։

Ավելի ուշ նրանց միջամտել է բորտուղեկցորդուհին՝ ասելով, որ ուղևորներին սմարթֆոններից օգտվել արգելելն իր պարտականությունն է։ Արդյունքում օդաչուն բարձրախոսով հայտարարել է, որ որոշում է կայացրել վերադառնալ օդանավակայան՝ տղամարդկանց իջեցնելու համար։

Վայրէջքից հետո Սիդնեյի օդանավակայանում ոստիկանության աշխատակիցները դիմավորել են ինքնաթիռն ու սրահից դուրս հանել կարգազանցներին։ Մնացած ուղևորները Կանբերա են հասել 25 րոպե ուշացումով։

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել