Factor.am-ը գրում է․
Հուլիսի 14-ին Հայաստանի ոստիկանապետ Վալերի Օսիպյանը ուղղաթիռով վերահսկում էր Ճանապարհային ոստիկանության ուժեղացված հսկողությունը: Ոստիկանապետը շրջայցը կատարում էր մասնավոր՝ «Արմենիան հելիքոփթերս» ընկերության ուղղաթիռով:
Factor TV-ին փորձեց պարզել, թե Ոստիկանությունն այդ թռիչքի համար որքան է վճարել: Ոստիկանությունից ստացանք ուշագրավ պատասխան. պարզվեց, որ մասնավոր «Արմենիան հելիքոփթերս» ընկերությունը ոստիկանապետի թռիչքի համար ուղղաթիռը տրամադրել էր անվճար: Ուղղաթիռի շահագործման ծախսերը հոգացել է «Արմենիան հելիքոփթերս» կազմակերպությունը, որը տարածաշրջանում նման ծառայություն մատուցող միակ կազմակերպությունն է: «Դա ոստիկանապետի թռիչք չի, դա ՀՀ ոստիկանության ծառայությանը մեր կողմից թեստային թռիչք է եղել, որը մենք ենք կազմակերպել՝ մեր միջոցների հաշվին, որպեսզի կարողանանք գնահատել արդյունավետությունը՝ ուղղաթիռների շահագործման»:
«Արմենիան հելիքոփթերս» ընկերության տնօրեն Արսեն Մանուկյանը Factor TV-ի հետ զրույցում այդպես էլ խուսափեց նշել, թե որքան է ընկերությունը վճարել Վալերի Օսիպյանի թռիչքի համար: Միաժամանակ նշենք, որ «Արմենիան հելիքոփթերս» ընկերության կողմից իրականացվող թռիչքի գները բավականին բարձր են և հասնում են մինչև կես միլիոն դրամի: Օրինակ 1 ժամ տևողությամբ թռիչքը դեպի Գառնի-Գեղարդ-Սաղմոսավանք-Օհանավանք և Ամբերդ ուղղություններով արժի 570 հազար դրամ: «Ծախսերը ծախսեր էին, ի՞նչ կարևոր է, թե ինչ թվերի մասին է խոսքը»,- ասաց տնօրենը:
Այնուհանդերձ նշենք, որ նման մի իրավիճակում կրկին պետական պաշտոնյայի կողմից անվճար օգտագործվել էր մասնավոր ընկերության սեփականատիրոջը պատկանող ինքնաթիռը ու այդ ժամանակ հակակոռուպցիոն կազմակերպությունների մասնագետները կոռուպցիոն ռիսկեր էին արձանագրել: Խոսքը՝ նախկին վարչապետ Կարեն Կարապետյանի մասին է, որը 2018 թվականի հունվարին ռուսաստանաբնակ հայ միլիարդատեր՝ «Տաշիր» ընկերությունների խմբի սեփականատեր Սամվել Կարապետյանին պատկանող ինքնաթիռով Դավոս էր մեկնել:
«Արմենիան հելիքոփթերս» ընկերության տնօրեն Արսեն Մանուկյանից հետաքրրքվեցինք՝ մտավախություն չունի՞ որ ոստիկանապետին անվճար տրամադրած ուղղաթիռի պարագայում էլ մասնագետները կոռուպցիոն ռիսկեր կարձանագրեն: «Կոռուպցիան ունի իր սահմանումը և կան մարմիններ, որոնք զբաղվում են կոռուպցիայով: Այն ինչ անում ենք մենք չեմ կարծում, որ տեղավորվում է կոռուպցիոն դրսևորման մեջ»,- պատասխանեց նա:
«Արմենիան հելիքոփթերս» ընկերության միջոցով Հայաստանում այս տարվա ապրիլի 8-ից ներդրվեց սանիտարական ավիացիայի ծառայությունը: Հիվանդների տեղափոխությունը մարզերից Երևան կատարվում է ինչպես պետական պատվերի, այնպես էլ հիվանդի կողմից վճարումների դեպքում: Թե որքան է վճարում քաղաքացին տեղափոխության համար, ընկերության տնօրենը հրաժարվում է թվեր նշել: Սակյան, նշենք, որ ուղղաթիռը շտապօգնության մեքենայից չորս անգամ արագ է հիվանդին ԲԿ տեղափոխում:
Մամուլում այս տարվա մայիսին եղան հրապարակումներ, որ սանավիացիայի ուղղաթիռը համալրված չէ համապատասխան բժշկական սարքավորումներուվ, ինչի արդյունքում Վանաձորից Երևան տեղափոխվող քաղաքացին մահացել է: «Արմենիան հելիքոփթերս» ընկերության տնօրենն այս տեսակետը չի կիսում.«Այդ մեկնաբանությունները կատարվում են սխալ տեղեկությունների վրա և դա վկայում է, որ նման տեղեկություն հրապարակողը չի տիրապետում ավիացիայի կանոններին: Հնարավոր չէ, որ ուղղաթիռն օդ բարձրանա և չունենա համապատասխան սարքավորումներ, դա անհնար է»:
«Արմենիան հելիքոփթերս» ընկերության տնօրեն Արսեն Մանուկյանը մարտին Aysor.am կայքին տված իր հարցազրույցում խոսելով սանավիացիայի ուղղաթիռի հագեցվածության մասին, նշել էր, որ հիվանդի տեղափոխություն իրականացվում է համապատասխան պատգարակով և նվազագույն բժշկական սարքավորումների առկայությամբ: Factor TV-ին ընկերության տնօրենից հետաքրքրվեց՝ արդյոք իր նշած նվազագույն բժշկական սարքավորումների առկայությունը չի՞ եղել Վանաձորից Երևան տեղափոխվող քաղաքացու մահվան պատճառը. «Բացարձակ չի նշանակում, մահացության դեպք կարող է շտապօգնության մեքենայում էլ լինի: Տեղափոխությունը կատարվում է հաստատված հիվանդությունների ցանկով, այսինքն՝ հաշվարկված են այն միջամտությունները, որ բուժանձնակազմին թույլ են տալիս օգնություն ցույց տալ օդնում»:
Ընկերության ևս երկու ուղղաթիռներ օգտագործվում են տուրիստական նպատակներով:
Ընկերությունն ունի չորս ուղղաթիռ, որից միայն երեքն են Հայաստանում, իսկ մեկը համապատասխան տեխնիկական ստուգումներ է անցնում: Շուտով սյն կսկսի ծառայություններ մատուցել Հայաստանում, իսկ մինչ այդ ընկերության աշխատակիցները փորձնական թռիչքներ են իրականացնում: «Ուղղաթիռները մեզ լայն հնարավորություն են տալիս՝ լինել հնարավորինս ճկուն և բավարարել մեր հաճախորդների պահանջները՝ վայրերի ու տեսարանների առումներով»:
Ընկերությունը ոչ կանոնավոր թռիչքներ է իրականացնում Հայաստանի ամբողջ տարածքում, ինչպես նաև Վրաստանի և Թուրքիայի տարածքում: Տնօրենն ասում է, որ ծառայությունները լայն շերտերին հասանելի դարձնելու համար ծրագրեր են իրականացվում: Ընկերությունը Երևանում իրականացնում է «Սիթի-տուր», որի արժեքը մեկ անձի համար 36 հազար դրամ է: Արսեն Մանուկյանը նշեց, որ 2500-ից ավելի ուղևոր արդեն օգտվել է այս ծառայությունից: Անդրադառնալով Ոստիկանությանը տրմադրած ուղղաթիռին, ընկերության տնօրեն Արսեն Մաուկյանը չբացառեց, որ հարկ եղած դեպքում կրկին անվճար ուղղաթիռ կտրվի գերատեսչությանը:
Մանրամասները՝ տեսանյութում:
