Factor.am-ը գրում է.
Factor.am-ի հարցազրույցը երգիչ, երգահան Վահան Արծրունու հետ
-Դատելով Ձեր ֆեյսբուքյան գրառումներից՝ հեղափոխությունից մեկուկես տարի հետո այդքան էլ լավատես չեք։ Ի՞նչ է պատահել։
-Ես իրատես եմ ավելի շատ։ Կարծում եմ՝ լավատեսության և դրա հակառակի էտապից մենք արդեն դուրս ենք եկել, որովհետև բոլոր լավատեսական պատկերացումները, որոնք կապված էին Նիկոլի և իր թիմի հետ, իր արդյունքը տվեց։ Նիկոլն ընտրվեց, ԱԺ-ն ձևավորվեց և սրան պետք է հետևի ռացիոնալ զարգացման երկրորդ փուլը, հանրության ինքնադրսևորման երկրորդ փուլը։ Որովհետև եթե մենք կառուցում ենք դեմոկրատական համակարգ, ենթադրում եմ, որ հանրությունը պետք է անմիջականորեն արձագանքի բոլոր իրադարձություններին, այսինքն՝ իր գնահատականը մշտապես տա իշխանության իշխելու ոճին և մնացած բոլոր պրոցեսներին, ինչը և տեղի է ունենում։
-Արդեն իսկ բաներ կան, որոնք Ձեր սրտով չեն…
-Իմ սրտով չի այն, որ հեղափոխությունից հետո հեղափոխական փոփոխություններ տեղի չեն ունենում։ Այսինքն՝ այն, ինչ ակնկալում էի, նկատի ունեմ սահմանադրական փոփոխությունները, դատական համակարգի վերափոխումը և մշակութային ոլորտում իմ բոլոր սպասումները, դեռևս չեն արդարացել։
-Հարցազրույցներից մեկում Դուք նշել եք, որ իշխանության խոսքի ու գործողությունների կապն այնքան էլ հաստատուն չէ, առայժմ միայն խոսքն է։ Դուք համաձայն չե՞ք, որ գոնե սոցիալական ոլորտում քայլեր են արվել, աշխատավարձեր են բարձրացվել։
-Իմ ընտանիքի անդամներից մեկի կարգավիճակը նկատի ունենալով, կնոջս մասին է խոսքը, անդրադառնամ այդ փոփոխության ազդեցությունն իր կարգավիճակի վրա։ Նա դասավանդում է Թատերական ինստիտուտում, նրա փաստացի աշխատավարձը 12 հազար դրամ է և դրան ավելացած 10 տոկոսը որևէ մեկի կամ որևէ ընտանիքի սոցիալական վիճակը չի կարող բարեփոխել։ Դա շատ լավ է, գուցե, այն մարդկանց համար, որոնք ստանում են 500 հազար դրամ և 50 հազար դրամը կարող է էական բարելավում բերել նրա սոցիալական դրությանը։ Բայց 80 տոկոսն աշխատավոր մարդկանց, որոնք ստանում են ինձ համար անհասականալի և անըմբռնելի նվազ չափերի աշխատավարձ, որևէ սոցիալական բարելավման դա չի կարող բերել։ Էլի փորձում եմ դատել որպես իրատես։
-Դուք Ամուլսարի շահագործման ընդդիմադիրներից եք։ Ձեզ մեր երկրի տնտեսական բարեկեցությունը հետաքրքիր չէ՞։
-Ո՛չ։ Ինձ մեր երկրի ապագայի և սերունդների առողջ վիճակն է ավելի շատ հուզում։ Եվ ես ոչ միայն Ամուլսարի, այլև բոլոր հանքերի շահագործմանն եմ դեմ արտահայտվում և կարտահայտվեմ։
-Փոխարենն ի՞նչ եք առաջարկում։ -Փոխարենն առաջարկում եմ զարգացնել տնտեսությունը, ՏՏ տեխնոլոգիաները, տուրիզմը, որն արդեն զարգանում է։ Կան ուղղություններ, որոնք արդարացնում են իրենց, մենք տեսնում ենք, որ որոշակի շարժ կա, աճ կա, տուրիստներ կան մեր փողոցներում։
-Այսինքն՝ այդտեղ մենք աճելու տեղ ունենք։
-Իհարկե: Մենք բոլոր ոլորտներում էլ աճելու տեղ ունենք։ Ես երեկ իմ ֆեյսբուքյան էջում տեղադրեցի Հոլանդիայի տնտեսության մասին մի հոլովակ: Չգիտեի, որ Հոլանդիան Ամերիկայից հետո աշխարհին կերակրող երկրորդ երկիրն է։
-Ձեզ ամենևին դուր չէր եկել Վարդավառի օրը գորգեր լվանալու՝ իշխանության նախաձեռնությունը։ Ձեր ֆեյսբուքյան էջում տեղեկություն կար, որ Ձեր 5 համերգի բյուջեն արժեցել է հենց այնքան, որքան խորհրդարանի գորգերը լվանալու օպերացիան՝ 5 միլիոն։ Դուք առաջարկում էիք գորգեր լվանալու փոխարեն համերգներ կազմակերպել։
-Չէ, ես առաջարկում էի, հիմա էլ եմ առաջարկում, թող շարունակեն գորգեր լվանալ, բայց ոչ 5 միլիոն դրամով, որը ձևավորվել է իմ ու ձեր աշխատավարձից։ Ինչքան ուզում եք՝ անվճար լվացեք ձեր գորգերը և ինչքան ուզում եք՝ փռեք։ Բայց չեմ կարծում, որ երբ Ձեր տան գորգերը լվանում եք, կանչում եք դիջեյ՝ իր հնչյունային սարքավորումներով, գրում եք սցենար այդ գորգը լվալու մասին, և չեմ կարծում, որ դրա համար գնում եք, կոպիտ ասած, 60 «պոլի փետ»։ Ողջամտության սահմաններ կան, որոնք այս բյուջեով խախտված ու խեղված են։ Նորմալ, բանական մարդը գորգ լվանալու վրա չի կարող ծախսել 5 միլիոն դրամ։ Եվ երբ ես հասկանում եմ, որ այդ գաղափարի հեղինակն ու իրականացնողն ԱԺ-ն է, ես չեմ կարող չարձագանքել որպես քաղաքացի։
-Դուք իշխանության վարքում ավելի շատ պոպուլի՞զմ եք տեսնում, թե՞ աշխատանք։
-Գիտեք՝ երբ է դառնում որևէ թեզ պոպուլիզմ… երբ դրա տակ թեզ չկա, երբ այդ թեզերը կախվում են օդում, դառնում են պոպուլիզմ։ -
Դուք հետևեցի՞ք «Էլարդ»-ի հետ Փաշինյանի տեսազրույցին։
-Չէ, չեմ հետևել, բայց տեղյակ եմ տեսազրույցի արդյունքներից, որ «Լիդիան»-ի հավաստիացումներն իրականությանն այդքան էլ չեն համապատասխանում։
-Տվյալ դեպքում գնահատելի՞ է այն, ինչ արեց Փաշինյանը։
-Փաշինյանն այս ընթացքում մեծ դիվիդենտներ է հավաքում, նրա տակտիկան է այդպիսին։ Նա հասունացնում է իրավիճակը, անհավանական լարվածության է հասցնում, հետո հանգուցալուծում է, ինչպես եղավ ԱԺ ընտրությունների ժամանակ։ Այդ լարվածությունը, որ ստեղծում է, ինքը կարողանում է սեփական իմիջին ծառայեցնել։ Եթե խոսում ենք վարկածներից, դա էլ կա, նա իրարամերժ իրավիճակներ է հասունացնում, որպեսզի իր ընդունած որոշումն աշխատի առաջին հերթին իր համար։
-Դուք Հերացու անվան բժշկական համալսարանի խորհրդի նախագահն եք։ Հետևո՞ւմ եք առողջապահության ոլորտի բարեփոխումներին։ -
Գիտեք՝ բժշկական համալսարանն այդքան էլ չի վերաբերվում առողջապահության ոլորտին, կրթության ոլորտն է։ Բայց այդ համալսարանն այն խաչմերուկն է, որտեղ հատվում են կրթությունն ու գործնական բժշկությունը, որովհետև սեփական կլինիկան ունի, որտեղ բժիշկներ են աշխատում, որոնք Առողջապահության նախարարությանն են ենթարկվում։ Ես հասկանում եմ բոլոր միտումները, հասկանում եմ ողջամտության և իրատեսության բաղկացուցիչն այդ ընթացքների մեջ, ես ուզում եմ հավատալ, որ այն, ինչ արվում է, առաջին հերթին արվում է պարզ քաղաքացու համար, որովհետև պարզ քաղաքացին ամենաանպաշտպան ստվար զանգվածն է մեր հանրության, և ես դեռևս հետևում եմ իրադարձություններին։ Չնայած նախարարի հայտարարությունները՝ կապված Ամուլսարի հետ, ինձ պարզապես ապշեցրին՝ և՛ որպես նախարարի, և՛ որպես բժշկի։ -
Դուք, այնուամենայնիվ, չե՞ք կարծում, որ նախարարն ավելի շատ տեղեկությունների է տիրապետում Ամուլսարի մասով։
-Ինձ ավելի հետաքրքիր է, թե նա ինչ կասի, երբ որոշեն չշահագործել Ամուլսարը։ Ինձ հետաքրքիր է, թե ինչ ինքնադրսևորում նա կունենա, իր ասած խոսքերի տակից ոնց դուրս կգա։ Մի բան էլ կա, եթե ունեն ինֆորմացիա, ինչո՞ւ չեն կիսվում։
-Նախարարը շատ հստակ է ասում, ընդամենը երեք օր առաջ ԱԺ-ում նա լրագրողներին ասում էր, որ որևէ վտանգ չի տեսնում։
-Եկեք իրատեսական մոտենանք. եթե մի մարդ տեսնում է վտանգ ծխախոտի մեջ և չի տեսնում վտանգ ցիանիդի մեջ, ինչ կարող եք ասել այդ մարդու մասին։
Հարցազրույցն ամբողջությամբ՝ տեսանյութում:
