Չինաստանի Հենան նահանգում ութ տարեկան տղան մոտ վեց տարի ապրել է պարանոցում գտնվող ասեղի բեկորներով, հաղորդում է AsiaOne տեղեկատվական պորտալը։
Երեխայի պապը նկատել է, որ թոռը քիչ է շարժվում և հաճախ է ընկնում, բայց դա վերագրել է նրա օրգանիզմում կալցիումի պակասին: Երբ տղան սկսել է դժգոհել պարանոցի սուր ցավից, ընտանիքը նրան տեղափոխել է հիվանդանոց:
Համակարգչային տոմոգրաֆիան ցույց է տվել, որ տղայի ողնաշարային անցքում երկու փոքր մետաղյա օբյեկտներ կան, և ևս մեկը՝ շնչափողի շրջանում:
Նյարդավիրաբույժ Լի Տաոն նախազգուշացրել է ընտանիքին, որ հապաղելու դեպքում նրանց երեխան կարող էր կաթվածահար մնալ: Նա նաև բացատրել է, որ ասեղի բեկորները բավականին մոտ են գտնվել շնչափողին և զարկերակներին, և վիրահատությունը մեծ ռիսկի տակ է կատարվել:
Յոթ ժամ տևողությամբ վիրահատության ընթացքում վիրաբույժներին հաջողվել է տղայի պարանոցից ապահով կերպով հեռացնել ասեղի բեկորները: Հիվանդը վերականգնվում է: