Մեքսիկացի քաղաքապետը ներկայացել է որպես անվասայլակին գամված հաշմանդամ, որն օգնության կարիք ունի, որպեսզի անձամբ ստուգի հանրային ծառայողների վերաբերմունքը:
Ինչպես գրում է Oddity central-ը, մի շարք բողոքներ ստանալով տարբեր հաշմանդամություն ունեցող բնակիչներից՝ կապված իրենց ստացած օգնության հետ՝ Չիուաուա նահանգի Կուաուտեմոկ քաղաքի քաղաքապետ Կառլոս Տենան չգիտեր ում հավատալ՝ բողոքողների՞ն, թե՞ իր գործընկերներին:
Այդպիսով՝ նա ծրագիր է մշակել սոցիալական աշխատակիցներին ստուգելու համար: Նա երկու ամիս հաշմանդամ է ձևացել և այցելել ինչպես իր գրասենյակի, այնպես էլ սոցծառայության աշխատակիցներին:
Հաշմանդամի սայլակին նստած, արևային ակնոցով և ծածկոցով փաթաթված՝ նա այցելել է համապատասխան հաստատություն՝ օգնություն խնդրելով: Նա անվճար ուտելիք է պահանջել, որը կազմում է հաշմանդամ քաղաքացիներին տրվող օգնության մի մասը, սակայն նրա խնդրանքն անտեսվել է:
Նա փորձել է նույն տեսքով այցելել իր գրասենյակ և հանդիպում պահանջել քաղխորհրդի քարտուղարի հետ, նրան ստիպել են ժամերով սպասել միջանցքում: Համոզվելով, որ բողոքները հավաստի են, նա վեր է կացել սայլակից և բացահայտել ինքնությունը՝ ապշահար թողնելով քաղաքապետարանի աշխատակիցներին:
