Որքան մոտենում է Դատավորների ընդհանուր ժողովի հուլիսի 11-ին սպասվող արտահերթ նիստի օրը, այնքան դատավորների շրջանում աժիոտաժը մեծանում է:
Համայնքից մեզ պատմեցին, որ ԲԴԽ անդամի պաշտոնին հավակնողներն արդեն քանի օր է՝ «քարոզարշավ» են սկսել, զանգում-խնդրում են դատավորներին, որ իրենց թեկնածության օգտին քվեարկեն:
Բանն այն է, որ արտահերթ այդ նիստի ընթացքում, որը տեղի կունենա Երևան քաղաքի ընդհանուր իրավասության դատարանի Աջափնյակ և Դավթաշենի նստավայրում, կընտրեն ԲԴԽ երեք թեկնածուների:
Հիշեցնենք՝ ԲԴԽ անդամ կարող են դառնալ 40 տարին լրացած, 10 տարի որպես դատավոր աշխատած, սակայն որևէ կարգապահական տույժի չենթարկված դատավորները: Բոլոր նրանք, ովքեր բավարարում են այս պահանջներին, ինքնըստինքյան համարվում են ԲԴԽ դատավոր-անդամի թեկնածու և ընդգրկվում են քվեաթերթիկում: Այն դեպքերում, երբ հիշյալ պահանջներին համապատասխանող թեկնածուները չեն ցանկանում առաջադրվել, պետք է ներկայացնեն ինքնաբացարկի մասին դիմումներ, որոնց վերջնաժամկետը, համաձայն Դատական օրենսգրքի, ավարտվում է քվեարկության օրվան նախորդող հինգերորդ օրվա մինչև 18:00-ն:
Ըստ նախնական տեղեկությունների՝ նման պահանջներին համապատասխանող դատավորների թիվը հասնում է շուրջ 4 տասնյակի, սակայն, ելնելով Դատական օրենսգրքի իրավակարգավորումներից, անհրաժեշտ է ուշադրություն դարձնել այն հանգամանքի վրա, թե ինչ համամասնությամբ և որ դատական ատյանների դատավորներից պետք է համալրեն ԲԴԽ անդամների թափուր տեղերը:
Բացի այդ, անհրաժեշտ է հաշվի առնել նաև դատավորների թեկնածուներից ընտրվելու դեպքում գենդերային համամասնության հարցը, որտեղ կին անդամների պարտադիր պահանջ էլ է նախատեսվում: Չնայած այս պահին դժվար է ասել՝ Դատավորների ընդհանուր ժողովը պետք է ընտրի երկու, թե երեք դատավոր, քանի որ դեռևս նախորդ տարվանից ՀՀ վճռաբեկ դատարանի քաղաքացիական և վարչական պալատի նախագահի պաշտոնը ստանձնելու հիմքով ԲԴԽ անդամությունից հրաժարված Ռուզաննա Հակոբյանի փոխարեն, գենդերային սկզբունքով, ընտրվել էր ՀՀ վճռաբեկ դատարանի դատավոր Նախշուն Տավարացյանը:
Բայց այս առումով էլ վճռաբեկ դատարանում արշալույսները խաղաղ չեն, քանի որ մեզ հայտնի է դարձել, որ ՀՀ վճռաբեկ դատարանը նույնպես բաժանվել է խմբերի, շատերը կողմ են, որ ԲԴԽ անդամ դառնա դատավոր Սուրեն Անտոնյանը:
Հաշվի առնելով, որ ներկայումս ԲԴԽ դատավոր 2 անդամներից մեկը՝ Անի Մխիթարյանը, Վերաքննիչ դատարանի դատավոր է, իսկ մյուսը՝ Սերգեյ Չիչոյանը, մարգի դատավոր, հետևաբար, ԲԴԽ երկու անդամները պետք է ընտրվեն ընդհանուր իրավասության դատարանների դատավորներից, որոնց թվում են Երևան քաղաքի և մարզային առաջին ատյանի ընդհանուր իրավասության դատարանները, ինչպես նաև ՀՀ վարչական դատարանն ու սնանկության դատարանը»,-գրում է թերթը:
Նյութն ամբողջությամբ կարդացեք թերթի այսօրվա համարում: