Աննա Մարգարյանը չընտրվեց ԲԴԽ անդամ: Հաշվիչ հանձնախմբի նախագահ Վահագն Հովակիմյանը հայտնեց քվեարկության արդյունքները, ըստ որոնց՝ Աննա Մարգարյանին՝ որպես ԲԴԽ անդամի կողմ է քվեարկել 66 պատգամավոր, դեմ՝ 19 պատգամավոր:

131 պատգամավորներից ընտրությանը մասնակցել է 85 պատգամավոր:

Նշենք, որ Աննա Մարգարյանին որպես ԲԴԽ անդամի թեկնածու առաջադրել էր ԱԺ «Իմ քայլը» խմբակցությունը: ԱԺ ընդդիմադիր խմբակցություններից «Լուսավոր Հայաստան» կուսակցությունը նշել էր, որ դեմ է քվեարկելու Մարգարյանի թեկնածությանը:

Մյուս ընդդիմադիր խմբակցությունը՝ «Բարգավաճ Հայաստան» կուսակցությունն էլ նշել էր, որ թեկնածուն բոլոր առումներով իրենց բավարարում է:

Նշենք, որ ԲԴԽ անդամ ընտրվելու համար անհրաժեշտ էր պատգամավորների ընդհանուր թվի ձայների երեք հինգերորդը: Այսինքն՝ Աննա Մարգարյանի ԲԴԽ անդամ ընտրվելու համար անհրաժեշտ էր առնվազն 76 պատգամավորի կողմ քվե, սակայն նրա օգտին քվեարկել է ընդամենը 66 պատգամավոր:

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել