Operativ.am-ը գրում է.
Հնագետները հայտնաբերել են Լագոդեխի արգելոցի տարածքում X դարին թվագրվող սալաքար ասոմթավրուլիով՝ վրացերենի հնագույն տեսակով, որը կիրառվել է շուրջ հազար տարի առաջ: Այդ մասին ասվում է Վրաստանի Մշակութային ժառանգության ազգային գործակալության տարածած հաղորդագրության մեջ, հաղորդում է Նովոստի-Գրուզիա-ն:
Սալաքարը հայտնաբերվել է Քոչալո վաղ միջնադարյան տաճարի փլատակների մոտ: Հնագետներն այնտեղ մաքրման աշխատանքներ էին իրականացոնւմ: Դավիթ Քվավաձեի գլխավորությամբ արշավախմբի աշխատանքները կազմակերպել էին տեղաբնակների նվիրատվությունների եւ կամավորների մասնակցության միջոցով:
Քոչալո տաճարը կառուցվել է VI-VII դարերում: Եթե հավատանք սալաքարի վրա նշված գրառումներին, X դարում այնտեղ եղել է մենաստան:
Գիտնականների խոսքերով՝ գրառումներում ասվում է եկեղեցուն հողեր փոխանցելու մասին: Դրանք մեծ պատմական արժեք են ներկայացնում, քանի որ դրանցում հիշատակվում են առ այսօր ոչ հայտնի ղեկավարներն ու Էրեթի պատմական շրջանի տեղագրական անունները: Դեռ ավելին, հնագույն տեքստերում խոսվում է նաեւ Էրեթիի թագավորի եւ թագուհու՝ Ադարնասի եւ Դինարայի մասին, որոնց վերաբերյալ պատմաբանները գիտեին միայն պատմողական (նառատիվ) աղբյուրներից:
