«Հարցագրույց ԱԺ նախկին պատգամավոր, «Այլընտրանքային նախագծեր խմբի» ներկայացուցիչ Վահե Հովհաննիսյանի հետ:
-Հեղափոխության 2-րդ փուլի մեկնարկը տրված է: Ըստ Ձեզ՝ որո՞նք են այս փուլի հիմնական բնութագրական առանձնահատկությունները:
- Թեև շատերը թերահավատորեն են այս ձևակերպմանը վերաբերվում, իմ կարծիքով՝ վատ ձևակերպում չէ, համենայնդեպս՝ անկեղծ է: Իսկապես, կարիք կա հասկանալու փուլերի տրամաբանությունը: Առաջին փուլն իշխանությունը վերցնելն էր: Դա արվեց հարյուր տոկոսանոց հաջողությամբ: Եթե նույնիսկ ընդունելի չէին մեթոդները՝ հապշտապ ընտրություններ, կեղծ թիրախներ, ներքին թշնամանք, թատերականացված պոռթկումներ և այլն, դրանից փաստը չի տուժում՝ այսօր կա մեկ հոգու իշխանություն: 2-րդ փուլի համար խնդիր է դրվում՝ պահել այդ իշխանությունը: Հիմա թիրախը լինելու են դատարանները, նպատակը՝ լիակատար վերահսկելի դատական համակարգ ունենալը: Կանխատեսելի է, որ 2-րդ փուլի երկրորդ սերիայում սկսվելու են ճնշումները փաստաբանական համայնքի վրա:
Սահակաշվիլու օրինակը դա է ցույց տալիս: Փաստաբանական համայնքը միշտ պրոբլեմ է կամակատար դատական համակարգի համար, և այդ պրոբլեմը երկրի քաղաքական իշխանությունը փորձելու է լուծել: Սա է կոնկրետ և շատ ռացիոնալ նպատակը, որից հետո, կարծում եմ, կսկսվեն կյանքի կոչվել մնացած գաղափարները՝ անցումային արդարադատություն, ունեզրկում, սեփականության վերաբաշխում և այլն: Ինչպես նաև պետական համակարգում կճնշվի ինքնուրույնության որևէ դրսևորում: Հասկանալի է, որ այս ամենը երկրում ձևավորելու է բավականին վատ մթնոլորտ, և հաշվարկել, թե դրանից հետո ինչ իրականություն ենք ունենալու, այսօր չափազանց դժվար է:
-Կարելի՞ է ենթադրել, որ կլինի նաև հեղափոխության 3-րդ կամ նույնիսկ 4-րդ փուլ:
-Տրամաբանորեն՝ այո, և 3-րդ փուլի էությունը լինելու է վերահսկելի մամուլ, վերահսկելի քաղաքական դաշտ ունենալը: Եթե կա միահեծան իշխանության հնարավորություն, միաձայն ԱԺ, վերահսկելի դատական համակարգ, ապա պետք է չեզոքացնել այլ կողմերի պոտենցիալ վտանգները»,-գրում է թերթը:
Նյութն ամբողջությամբ կարդացեք թերթի այսօրվա համարում: