11:08
Մայթն ապօրինի զավթված էր, և տնտեսվարողը չափից ավելի էր առաջ եկել, որի իրավունքը չի ունեցել. Tert.am-ի հետ զրույցում ասաց Երևանի ավագանու «Իմ քայլը» խմբակցության անդամ Իզաբելա Աբգարյանը:
Ըստ նրա՝ տնտեսվարողը զգուշացվել էր՝ վերականգնել մայթի նախնական տեսքը, բայց վերականգնելու փոխարեն մի բան էլ փորձում էր բացօթյա ամառային սրճարան կառուցել:
«Եվ եղավ արդյունքն այն, որ տվյալ պահին վարչական շրջանը վերականգնում է մայթի չափը, ինչպես և եղել է»,- ասաց նա և հավելեց, որ զրուցել է տնտեսվարողի հետ, լսել թե՛ վարչական շրջանի, թե՛ տնտեսվարողի կարծիքը:
«Մյուս կողմից տնտեսվարողն էլ, երբ սկսել է անել, վարչական շրջանից պարտավոր էին ասել՝ նորմերը որոնք են և կասեցնել, որպեսզի մարդը ծախս չաներ զուր տեղը: Չեմ ուզում մտածել, որ կոռուպցիոն ռիսկեր են եղել, թող դա հետագայում պարզվի, պարզապես ժամանակին աչքակապություն է արել վարչական շրջանը և թույլ է տվել, որ այս ամենը տեղի ուենա»,- ասաց Աբգարյանը:
Հարցին՝ սեփականության իրավունք չունի՞ տնտեսվարողը, վերջինս պատասխանեց. «Սա ոչ մեկին չի կարող պատկանել, որևէ մեկը չի կարող մայթը սեփականաշնորհել»:
09:52
Երևան քաղաքի Կոմիտաս 15 հասցեում Երևանի քաղաքապետարանը ապօրինի շինություն է ապամոնտաժում:
Ավագանու անդամ Իզաբելա Աբգարյանը Ֆեյսբուքի իր էջի միջոցով հայտնել է, որ ապօրինի շինություն է, կառուցապատողը մի քանի անգամ զգուշացվել է, ծանուցումներ են ուղարկվել, սակայն կառուցապատողը շարունակել է կառուցել:
Տեղում են իրավապահները, Արաբկիրի թաղապետն ու քաղաքապետարանի ներկայացուցիչը: