168.am-ը գրում է.
Թեհրանի եւ Վաշինգտոնի միջեւ երկխոսությունը հնարավոր է միայն փոխադարձ հարգանքի պայմանով, եւ ԱՄՆ-ն ինքը պետք է ընդունելի պայմաններ ապահովի բանակցությունների վերսկսման համար: Այդ մասին, ինչպես հայտնել է Al-Jazeera հեռուստաալիքը, հունիսի 2-ին հայտարարել է Իրանի նախագահ Հասան Ռոուհանին:
«Վաշինգտոնի հետ բանակցություններ կարող են անցկացվել միայն մեկ հնարավոր ճանապարհով»,- նշել է նախագահը: Նա հավելել է, որ «այդ ճանապարհը փոխադարձ հարգանքն է»: «Առանց դրա չկան բանակցություններ»,- ասել է Ռոուհանին: Իրանի նախագահը նաեւ նշել է, որ «բանակցությունների սեղանից հեռացած եւ միջազգային պայմանագիրը ոտնակոխ արած կողմն ինքը պետք է վերադարձնի երկխոսության նորմալ պայմանները»:
Ավելի վաղ Իրանի արտաքին գործերի նախարարության պաշտոնական ներկտայացուցիչ Աբաս Մուսավին կոչ է արել Վաշինգտոնին՝ փոխել ԱՄՆ-ի քաղաքականությունը Իրանի Իսլամական Հանրապետության նկատմամբ, այլ ոչ թե բառախաղերով զբաղվել: Իրանցի դիվանագետի մեկնաբանությունն արվել է այն բանից հետո, երբ ԱՄՆ-ի պետքարտուղար Մայքլ Փոմպեոն հայտարարել է առանց նախապայմանների Իրանի հետ երկխոսություն սկսելու պատրաստակամության մասին:
ԱՄՆ-ի Պետդեպարտամենտի մամուլի ծառայության ղեկավար Մորգան Օրտեգուսը մայիսի 29-ին լրագրողներին հայտարարել է, որ Վաշինգտոնը մտադիր է շարունակել ճնշումը Թեհրանի վրա, որպեսզի ստիպի Իրանի իշխանություններին բանակցություններ վարել նոր համապարփակ համաձայնագիր կնքելու շուրջ, որը կխոխարինի իրանական միջուկային ծրագրի վերաբերյալ Գործողությունների համատեղ համապարփակ ծրագրին: Իրանի նախագահ Հասան Ռոուհանին չի բացառել ԱՄՆ-ի հետ բանակցությունների հնարավորությունը, եթե Վաշինգտոնը չեղարկի Թեհրանի նկատմամբ սահմանված պատժամիջոցները եւ հրաժարվի Իրանին ճնշելու քաղաքականությունից:
«Ցանկացած ժամանակ, երբ նրանք կդադարեցնեն ճնշել իրանական ազգին, կհրաժարվեն իրենց պատժամիջոցներից եւ հանձնառու կլինեն իրենց պարտավորություններին, նրանք կարող են վերադառնալ բանակցությունների սեղանի շուրջը, որը նրանք են լքել, այդ ճանապարհը նրանց համար փակ չէ»,-ասել է Ռոուհանին: Մինչդեռ ավելի ուշ Իրանի հոգեւոր առաջնորդ եւ եւ ղեկավար այաթոլլ Ալի Խամենեին հայտարարել է, որ Վաշինգտոնի հետ բանակցությունները, իր կարծիքով, ոչինչ չեն տալիս, բացի վնասից, հաղորդել է ՏԱՍՍ-ը:
