Hraparak.am-ը գրում է.
Ուկրաինացի իրավաբան Անդրեյ Պորտնովը մտադիր է հասնել այն բանին, որպեսզի կալանք դրվի Ուկրինայի նախկին նախագահ Պետրո Պորոշենկոյի՝ Ուկրաինայում եղած ունեցվածքի վրա։ Այս մասին հայտնում է «112 Украина»-ն։ Պորտնովը հայտարարել է, որ խնդրելու է Հետաքննությունների պետական բյուրոյին, որպեսզի միջնորդություն ներկայացնի դատարան՝ կալանք դնել այն ամենի վրա, ինչը որ «շարժվում է» Պորոշենկոյի հարկային հայտարարագրում, ներառյալ՝ բանկային հաշիվներ, բաժնետոմսեր, ակտիվներ, պետական փոխառության արժեթղթեր, օֆշորային ընկերություններ, որոնք նույնիսկ ձեւակերպված են այլոց անուններով։
Իրավաբանը նաեւ ասել է, որ մեղադրում է Պորոշենկոյին պետական դավաճանության եւ իշխանազավթման փորձի մեջ։ Նա հանցակազմ է տեսել նույնիսկ Կերչյան ռուս-ուկրաինական ծովային բախման միջադեպում, որը տեղի է ունեցել անցյալ տարի։ Ուկրաինացի իրավաբանը կարծում է, որ Պորոշենկոն թույլ է տվել, որպեսզի Ռուսաստանը կարողանա միջամտել ներուկրաինական կյանքին։
