Ամերիկուհի Քայլա Էդվարդսը հղիացել է արգանդի փոխպատվաստման եզակի վիրահատության շնորհիվ։ Ինչպես տեղեկացնում է The Daily Mail-ը, 27-ամյա Քայլան տառապում է Մայեր-Ռոկիտանսկի-Կուստեր-Հաուզերի (ՄՌԿՀ) ախտանիշով, այսինքն՝ զարգացման բնածին արատով, որը հանգեցրել է արգանդի բացակայության։ Ախտորոշումն արվել է այն ժամանակ, երբ նա 16 տարեկան էր, բայց կինը հույսը չէր կորցրել, որ երբևէ կմայրանա։

Քայլան համաձայնեց փորձարարական բուժման մասնակցել ԱՄՆ Բեյլորի համալսարանի բժշկական կենտրոնում, որը հետազոտություններ էր իրականացնում արգանդի փոխպատվաստման ոլորտում։

Մեկ տարի անց՝ 2017-ին, Քայլան վիրահատության ենթարկվեց: Արհեստական բեղմնավորման երեք անհաջող փորձերից հետո բժիշկները կնոջը տեղեկացրին, որ չորրորդ տեղադրումը վերջինն է լինելու։ Այս անգամ հաջողությունը ժպտաց Քայլային, և այս տարվա հունվարին հայտնի դարձավ, որ նա հղի է։

Երեխան լույս աշխարհ է գալու հոկտեմբերին, և Քայլան ամուսնու հետ ապագայի երջանիկ պլաններ է գծում։ Քայլան հույս ունի, որ իր պատմությունը կոգևորի այն կանանց, որոնք, ինչպես և ինքը, հիվանդության պատճառով երեխա ունենալ չեն կարող։

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել