ԱՄՆ-ում իշխանությունները խլել են հիվանդ երեխային իր ծնողներից, որոնք հրաժարվել են բուժել նրան հիվանդանոցում։ Այդ մասին տեղեկացնում է Washington Post-ը։
3-ամյա Նոա Մաքադամսի մոտ սուր լիմֆոբլաստիկ լեյկոզ են հայտնաբերել։ Մոտ երկու շաբաթ անց մայրը երեխային վերցրել է հիվանդանոցից և տուն բերել։
«Մենք փախանք հիվանդանոցից և քաղցկեղի բջիջներից ոչ մի հետք արդեն չի մնացել, բժիշկներն ապշած էին նրա ուժով և առողջացման արագությամբ»,- գրել է մայրը Ֆեյսբուքում։
Կինը որոշել է ինքնուրույն շարունակել բուժումն այլընտրանքային բժշկության միջոցով։
Երբ տղան չի եկել հիվանդանոց քիմիաթերապիայի հերթական փուլն անցնելու համար, նրա հանդեպ հետախուզում են հայտարարել։ Ոստիկանությունը հայտնաբերել է երեխային և վերցրել նրան ծնողների մոտից, որպեսզի նա կարողանա շարունակել բուժում ստանալ հիվանդանոցում։
Նոայի ծնողներին կարող է մեղադրանք առաջադրվել անչափահասի դաստիարակության գործում պատասխանատվությունները չկատարելու համար, սակայն ծնողները պնդում են, որ չեն հրաժարվել իրենց որդու բուժումից, բայց նախընտրում են այնպիսի մեթոդներ, որոնք իրենք ավելի առողջ են համարում։
