«ՀՀ Կենտրոնական բանկը ցանկացած թղթադրամի տպագրության վերաբերյալ, մասնավորապես՝ 3-րդ սերնդի թղթադրամների վերաբերյալ ունի հստակ նկարագրություն, որը դեռևս մինչև թղթադրամների տպագրումն ու շրջանառության մեջ դնելը տեղադրված է եղել ԿԲ կայքում»,- անդրադառնալով հուշարձանագետ Սամվել Կարապետյանի գրառմանը՝ Tert.am-ի հետ զրույցում պարզաբանեց ԿԲ հասարակայնության հետ կապերի ծառայության ղեկավար Հարություն Բերբերյանը:
Նա նշեց, որ նկարագրությունը տեղեկություններ է ներկայացնում թղթադրամների չափսերի, գույների, դիմերեսի և դարձերեսի պատկերների վերաբերյալ։
«Մասնավորապես 5000 դրամի համար ներկայացված նկարագրության մեջ նշված է, որ դիմերեսին Վիլյամ Սարոյանի դիմանկարն է, որի ֆոնին հատվածներ են իր «Նռնենիները» պատմվածքից, ինչպես նաև կան գրքերի նկարազարդումներ և հայկական նռնենիների պատկերներ: Դարձերեսին Վիլյամ Սարոյանի՝ Երևանում տեղադրված արձանն է, իսկ դրա ֆոնին նրա նախնիների ծննդավայր Բաղեշ քաղաքի՝ 20-րդ դարասկզբի համայնապատկերն է, որը վերցված է հենց այդ ժամանակաշրջանում՝ 20-րդ դարասկզբին արված լուսանկարից: Նկարագրության մեջ ոչ մի տեղ նշված չէ, որ արձանի ֆոնին ներկայացված է եկեղեցի: Այսինքն՝ հուշարձանագետ Սամվել Կարապետյանի դիտարկումը, թե պատկերվածը ներկայացվում է որպես եկեղեցի, արդեն մոլորեցնող է»,- ասաց Բերբերյանը:
Հարություն Բերբերյանը ևս մեկ անգամ ընդգծեց, որ քննարկման ելակետն ի սկզբանե սխալ է ընտրված հուշարձանագետի կողմից, քանի որ երբևէ չի նշվել, որ 5000 դրամ նոր թղթադրամի վրա պատկերվածը հայկական եկեղեցի է:
Հիշեցնենք, որ հուշարձանագետ Սամվել Կարապետյանը ֆեյսբուքյան իր էջում գրառում էր կատարել՝ նշելով, որ 5000 դրամանոց նոր թղթադրամի դարձերեսին պատկերվածը ոչ թե հայկական եկեղեցի է, այլ մահմեդական դամբարան։
