British Airways ավիաընկերության ինքնաթիռում Սինգապուր-Լոնդոն չվերթի ժամանակ խուճապ է սկսվել, երբ օդաչուն իր խցում շփոթել է կոճակները, հաղորդում է The Sun-ը:
«Սկզբում անջատվեցին տեղեկատվական վահանակները և լույսը, այնուհետև ընկան թթվածնի դիմակները, և դրանք հագնելու խնդրանքով հայտարարություն հնչեց»,- պատմել է ուղևորներից 24-ամյա Միտչել Ուեբը:
Մի քանի րոպե անց անձնակազմը հորդորել է ուղևորներին ուշադրություն չդարձնել հայտարարությանը, քանի որ այն միացել է տեխնիկական սխալի պատճառով, և բորտուղեկցորդներից մեկը խոստացել է վերացնել համակարգում առաջացած խնդիրները:
«Եվ նույնիսկ այդ խուճապային իրավիճակից հետո օդաչուից որևէ բացատրություն կամ ներողություն չենք ստացել»,- դժգոհել է Ուեբը:
Սակայն ավիաընկերությունը հետագայում ներողություն է խնդրել ուղևորներից էլեկտրոնային հաղորդագրությունների միջոցով և խոստացել պարզել միջադեպի պատճառները: