Azatutyun.am-ը գրում է.
Հայ-ռուսական դաշնակցային հարաբերությունների ընթացիկ օրակարգին են անդրադարձել Ազգային ժողովի փոխխոսնակ Ալեն Սիմոնյանը և Հայաստանում Ռուսաստանի դեսպան Սերգեյ Կոպիրկինը այսօր կայացած հանդիպման ժամանակ:
Սիմոնյանը երկու երկրների միջպետական հարաբերությունների համատեքստում ընդգծել է հայ-ռուսական խորհրդարանական փոխգործակցության դերը՝ հավաստիացնելով, որ ՀՀ Ազգային ժողովի և ՌԴ Դաշնային ժողովի միջև համագործակցության միջխորհրդարանական հանձնաժողովն իր համանախագահությամբ կշարունակի արդյունավետ աշխատանքը:
Բարեկամ ժողովուրդների հարաբերությունների առավել խորացման հարցում ԱԺ փոխնախագահը կարևորել է դեսպանի գործուն մասնակցությունն ու աջակցությունը՝ համագործակցելու պատրաստակամություն հայտնելով:
Ալեն Սիմոնյանն իր մտահոգությունն է հայտնել ռուսաստանցի որոշ գործընկերների՝ փետրվարի 26-ին Բաքվում կազմակերպված հակահայկական միջոցառմանը մասնակցության առնչությամբ, ասված է ԱԺ լրատվության և հանրության հետ կապերի վարչության հաղորդագրությունում:
Ռուսաստանի Պետդումայի մի խումբ պատգամավորներ Ադրբեջանի մայրաքաղաքում մասնակցել են Խոջալուի դեպքերի հերթական տարելիցին նվիրված միջոցառմանը, ինչի կապակցությամբ ավելի վաղ պաշտոնական Երևանը իր վրդովմունքն է արտահայտել, խնդրին անդրադարձել է նաև Հայաստանի Ազգային ժողովի նախագահ Արարատ Միրզոյանը Ռուսաստանի խորհրդարանի վերին պալատի՝ Դաշնության խորհրդի լիագումար նիստում իր ելույթում:
