Բրազիլական Սան Պաուլու քաղաքում մեկնարկած ամենամյա կառնավալի շրջանակում Rosas de Ouro սամբայի դպրոցն իր ելույթը նվիրել է Հայաստանին ու հայ ժողովրդին: Դպրոցի կազմակերպած շոուն կոչվել է «Viva Hayastan»: Այն բաղկացած է եղել հինգ թեմայից՝ «Դրախտն Արարատի հովիտներում», քրիստոնեություն, հայկական հերոսներ, մշակույթ և «Մայր Հայաստան»:
Շոուն մեկնարկել է Հայոց ցեղասպանության զոհերի հիշատակի ոգեկոչմամբ, ինչին հաջորդել է հայկական դրոշի գույներով կռունկի «ելույթը»՝ խորհրդանշելով հայ ժողովրդի վերածնունդը:
«Հայկական դրախտ» բաժնում բեմադրվել են Ադամի և Եվայի, Նոյյան տապանի աստվածաշնչյան պատմությունները:
«Հայկական հերոսներ» բաժնում ցուցադրվել են Տիգրան Մեծ թագավորի և հայազգի տարբեր մարտիկների քանդակները, իսկ «Քրիստոնեություն» բաժնում սամբայի բրազիլացի վարպետները ներկայացրել են Հայաստանում կրոնի պատմությունը, կաթողիկոսներին, սրբավայրերը:
Վերջին՝ «Մայր Հայաստան» բաժնում ներկայացվել է հայկական մշակութային ժառանգությունը:
Տեսանյութում այդ հատվածից փոքր դրվագ կարող եք դիտել 50:56 րոպեից.
