Բրիտանական The Guardian պարբերականն ուշագրավ ֆոտոշարքով անդրադարձել է Վենեսուելայի և Կոլումբիայի սահմանին ցուցարարների ու զինվորականների միջև տեղի ունեցած բախումներին, որոնց հետևանքով կան հարյուրավոր տուժածներ: Բախումների պատճառը եղել է այն, որ Վենեսուելայի իշխանությունները թույլ չեն տվել մարդասիրական օգնությամբ բեռնված ամերիկյան բեռնատարներին երկիր մտնել:
Նշվում է, որ զինծառայողներն արցունքաբեր գազ են կիրառել ցուցարարների դեմ, մինչդեռ բեռնատարները հրկիզվել են: Հայտնի է, որ երկրի նախագահ Նիկոլաս Մադուրոն հայտարարել է Կոլումբիայի հետ դիվանագիտական հարաբերությունները խզելու մասին: Նմանատիպ բախումներ են տեղի ունեցել նաև Բրազիլիայի հետ սահմանին, որտեղ չորս մարդ է զոհվել:
Հիշեցնենք, որ Վենեսուելայում հունվարից զանգվածային բողոքի ցույցեր են սկսվել՝ ընդդեմ երկրի գործող նախագահ Նիկոլաս Մադուրոյի: Ընդդիմադիր խորհրդարանի նախագահ Խուան Գուաիդոն իրեն հռչակել է երկրի ժամանակավոր նախագահ:
ԱՄՆ-ը և մի շարք այլ երկրներ աջակցություն են հայտնել ընդդիմադիր առաջնորդին, սակայն կան մի շարք երկրներ, որոնք իրենց աջակցությունն են հայտնել Մադուրոյին:
