Armsport.am-ը գրում է.
Մոսկվայում անցկացվել է գեղարվեստական մարմնամարզության «Գրան պրի» միջազգային ավանդական մրցաշարը, որտեղ Հայաստանը ներկայացրել են տարիքային երկու խմբի հինգ մարզուհիներ:
ՀԱՕԿ-ի հաղորդմամբ, ավագների բազմամարտի պայքարում Յուլիա Վոդոպյանովան գրավել է վեցերորդ տեղը:
Նրա թիմակից Յասմինա Աղագուլյանը ութերորդն էր գնդակով վարժությունում, իսկ Սիլվա Սարգսյանը բավարարվել է ավելի համեստ արդյունքով:
Երիտասարդներ Աբիգայլ Պողոսյանը և Անժելիկա Կարախանյանը առաջին անգամ են մասնակցել արտագնա մրցումների, կարողացել են լիովին դրսևորել իրենց ունակությունները, թեև առաջատարների շարք չեն մտել:
Մրցումների ընթացքին հետևող երևանցի մրցավար Գայանե Ներսիսյանն ասել է, որ մրցաշարին մասնակցել են 36 երկրի պատվիրակներ: Նրանց հետ պայքարը բավականին հարստացրել է մեր մարզուհիների մրցափորձը:
Ընթացիկ մրցաշրջանը կարևոր է հատկապես նրանով, որ կվիճարկվեն օլիմպիական խաղերի ուղեգրեր: Դրանք բաժին կհասնեն Բաքվում կայանալիք Եվրոպայի (հունիսին) և աշխարհի (սեպտեմբերին) առաջնությունների հաջողակներին:
