Ազգային ժողովի դահլիճում տխուր է, ժպիտ չկա, իսկ դա նշանակում է՝ հաճույք չենք ստանում մեր աշխատանքից. Վարազդատ Կարապետյան

Ազգային ժողովի «Իմ քայլը» խմբակցության պատգամավոր Վարազդատ Կարապետյանը կարծում է, որ տնտեսական հեղափոխության սահմանումը պետք է տալ, քանի որ այդ հասկացության ընկալման տարբերություններ կան:

 

«Հայաստանում բացառիկ հնարավորություն ունենք մարդկային ստեղծարար ուժը դարձնել տնտեսական աճի հիմնական գործոն: Մենք հստակ հայտարարում ենք, որ Հայաստանում ոչ թե կապիտալն է տնտեսական աճի շարժիչ ուժը, այլ մարդկային ստեղծարար ուժը: Հենց այստեղ է հեղափոխությունը», - Ազգային ժողովում կառավարության ծրագրի քննարկման ժամանակ հայտարարեց Վարազդատ Կարապետյանը՝ կարծիք հայտնելով կառավարության ծրագրի նախագծի մասին:

 

Պատգամավորի խոսքով՝ իշխանության ընդդիմախոսները պետք է ցույց տան լրացուցիչ ճանապարհներ՝ օգնելու ինչպե՞ս, ինչ ոլորտներում է հնարավոր մարդու ստեղծարար ուժը աշխատեցնել: 

 

«Պետք է ցույց տալ ինչպես անել, որ մարդիկ ավելի լավ, ավելի շատ աշխատեն մեր երկրում, զգան իրենց այդ աշխատանքի մեջ, սիրեն այդ աշխատանքը, մենք էլ՝ մեր աշխատանքը, վերջիվերջո, որովհետև մեր դահլիճում տխուր է անցնում օրը, եթե նկատել եք: Ժպիտ չկա, դա նշանակում է, որ մենք էլ մեր աշխատանքից հաճույք չենք ստանում: Մենք մեր աշխատանքից պետք է սկսենք հաճույք ստանալ:

 

Իհարկե, այստեղ լուսամուտներ չկան, բայց պետք է սկսենք կոտրել այս իրավիճակը ու դուրս գանք այս իրավիճակից», - ժպտալով հայտարարեց Վարազդատ Կարապետյանը:

 

Նրա այս ելույթը առաջացրեց դահլիճում նստած վարչապետի ծիծաղը: