Azatutyun.am-ը գրում է.

«Ազատության» տաղավարում հյուրընկալվել է Ազգային ժողովի պատգամավոր, «Լուսավոր Հայաստան» խմբակցության քարտուղար Գևորգ Գորգիսյանը:

«Ազատություն». - Պարոն Գորգիսյան, ենթադրաբար հաջորդ շաբաթ նաև Ձեր սեղանին կդրվի կառավարության կազմի փոփոխության փաթեթը, կո՞ղմ եք, որ 12 նախարարություն է մնում։

Գորգիսյան. - Ինչո՞ւ այս նախարարությանը կրճատվեց, ինչո՞ւ այն նախարարությունը կրճատվեց․․․ ինչի՞ սա չկրճատվեց, նա կրճատվեց, եթե երկու բան անում է նույնը, պետք է որոշել՝ սա՞, թե՞ նա։ Նաև հիմա սպասվում են մեծ կրճատումներ էդ ոլորտում։ Քաղաքացիներին պետք է ինչ-որ մեսիջ հղվի, որ ինչպես է արվելու այդ կրճատումը, ինչպես են ընտրվելու այն մարդիկ, ովքեր շարունակելու են աշխատել։ Շատ մեծ է հիմա վախը, որ կրկին խնամի-ծանոթ-բարեկամ սկզբունքն է աշխատելու, և հաշվի չեն առնվելու մասնագիտական ընդունակությունները, փորձը, այլ ընդհակառակը՝ հաշվի են առնվելու կուսակցական պատկանելություն կամ խնամի-ծանոթ-բարեկամ, ինչպես ժամանակին եղել է։ Պետական համակարգը ուռճացված է, բայց էդ փոփոխությունը պետք է բխեր էն տեսլականից, էն մոտեցումներից, ինչ նպատակ մենք դնում ենք մեր առաջ։ Դեռևս էս կապը չի երևում։ Կարևոր կետը, էսպես նշենք, դա սուպերվաչապետական համակարգի պահպանումն է, որը փաստացի քննադատել են մեկ տարի առաջ և՛ Նիկոլ Փաշինյանը, և՛ Արարատ Միրզոյանը, նույնիսկ դա անվանել են տոտալիտար համակարգի սկիզբ։

«Ազատություն». - Անցած շաբաթ վարչապետը ասաց ասաց անելու ենք, բայց՝ անցնցում, աստիճանաբար։

Գորգիսյան. - Ե՞րբ։ Գիտեք, հիմա է դրա պահը, որովհետև հիմա փոխվում է կառավարության կառուցվածքը։ Հիմա Ազգային ժողովի օրակարգում կա այդ հարցը: Եթե հիմա չեն անում, ես չեմ պատկերոցնում՝ երբ և ինչի հետևանքով, այսինքն ի՞նչ պայմանի դեպքում կառավարությունը կգնա այդ քայլին։

«Ազատություն». - Ամենայն հավանականությամբ նկատի ունեք ԱԱԾ-ի և ոստիկանության հարցը: Նիկոլ Փաշինյանն ասում է՝ ի՞նչ է նշանակում նախարարություն ոստիկանության պարագայում, նշանակում է, որ քաղաքական դեմք պետք է նշանակվի այդ ուժային կառույցի ղեկավար, սրանից բխում է, որ այդ ուժային կառույցը ուղղակիորեն կամ անուղղակիորեն կուսակցականացվելու է: Իսկ հիմա, ասում է, հակառակն է․ գոնե ինչ-որ չափով:

Գորգիսյան․ - Լրիվ հակառակը: Հենց հիմա ավելի կուսակցական և քաղաքական է, քան մեր առաջարկած տարբերակով: Նախ գանք սուպերվարչապետական համակարգին, ինչպես դառավ․․․ Նախկինում կար Ներքին գործերի նախարարություն Կառավարության կազմում, և որպեսզի վարչապետին թուլացվի և նախագահի լիազորությունները ավելանան՝ ունենալով սուպերնախագահական երկիր, էդ ուժային կառույցները տարան նախագահի անմիջական ենթակայության տակ: Հետագայում, երբ Սերժ Սարգսյանը արդեն պիտի նախագահից դառնար վարչապետ, պարոն Փաշինյանի բառերով ասեմ՝ իր հագով կարվեց այդ կոստյումը, և էդ մարմինները չմտան Կառավարության կազմ, այլ, որպես վարչապետին արդեն ենթական մարմիններ, ձևավորվեցին: Ինչը նրանց դուրս է դնում խորհրդարանական վերահսկողությունից:

«Ազատություն»․ - Կրկին Նիկոլ Փաշինյանին մեջբերեմ․ ասում է՝ աննախադեպ բան է, ԱԱԾ-ը ղեկավարը գալիս է և հաշվետվություն է ներկայացնում խորհրդարանում:

Գորգիսյան․ - Նա պարտավոր չէ, նա կարող է գալ: Համապատասխան հանձնաժողովը տարբեր հարցումների, տարբեր քննարկումների շրջանակում կարող է նրան հրավիրել: Բայց նա կարող է գալ, կարող է չգալ: Մենք պետք է «բարի ու չար թագավորներից» վերանանք, պետք է ինստիտուտներ լինեն, ինստիտուտներ գործեն․․․ Այսօր ուզում է գալ, վաղը կարող է չգալ: Այսօր իրեն ձեռնտու հարց է քննարկվում, վաղը կարող է քննարկվում է իր՝ կոռուպցիայի մեջ թաթախված լինելու հարցը․․․ կարող է և չգալ: Հիմա անդրադառնանք քաղաքականացվել֊չքաղաքականացվելուն: Մենք ունենք Պաշտպանության նախարարություն: Կառուցվածքն այսպես է՝ կա նախարար, որը քաղաքական դեմք է, որը պատասխանատու է քաղաքականության մշակման, քաղաքականության իրականացման համար, և նաև, այո, քաղաքական ուժի ներկայացուցիչ է: Եվ կա Գլխավոր շտաբ, որը պատասխանատու է արդեն ոլորտի ֆունկցիոնալ գործունեության համար, որը տոտալ ապաքաղաքական մարմին է և լուծում է իր առջև դրած խնդիրը: Եթե պարոն Փաշինյանի ասածը ճիշտ լիներ, դա նշանակում է, որ իրենք իշխանության գալու դեպքում պիտի ԱԱԾ-ի պետին և Ոստիկանության պետին չհեռացնեին աշխատանքից, պահեին: Որովհետև դրանք ապաքաղաքական մարմիններ են: Բայց էդպես չեղավ, չէ՞: Նրանք առաջին հերթին հեռացրեցին հենց այդ մարմինների ղեկավարներին և նշանակեցին իրենց վստահելի մարդկանց:

«Ազատություն»․ - Որովհետև քաղաքական իշխանությանն էին ծառայում:

Գորգիսյան․ - Իսկ ինչո՞ւ պիտի չծառայեին․․․ Որովհետև նրանց ենթական չեն խորհրդարանական վերահսկողությանը: Մենք ի՞նչ ենք առաջարկում․ նույն ձևով, ինչպես աշխատում է պաշտպանության ոլորտը, լինի այստեղ: Լինի ոլորտների քաղաքական պատասխանատու, լինի քաղաքականություն մշակող, և լինեն ֆունկցիոնալ, անկախ՝ ինչքանով դա հնարավոր է, և ապաքաղաքական մարմիններ: Բայց լինի մարդ՝ քաղաքական պատասխանատուն, որ էդ ֆունկցիաների ձախողման պարագայում․․․ իրենք գան և կրեն էդ պատասխանատվությունը: Հիմա որևէ մեկը չկա, ով կարող է բացթողումների համար պատասխան տալ»:

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել