«Հրապարակն» իր խմբագրականում գրում է. «Երեկ համացանցում պտտվում էր ինչ-որ մեկի կազմած ցանկը՝ հեղափոխությունից հետո տեղի ունեցած դրական փոփոխությունների: 17 կետ՝ մեկը մյուսից աբսուրդ:
Կետերի մեծ մասը խոստումներ են, օրինակ՝ «Երևանում կկառուցվի ինովացիոն պարկ» կամ՝ «ինժեներական լաբորատորիաներ կբացվեն Գեղարքունիքի դպրոցներում»: Մի մասը՝ ուղղակի դատողություններ, ասենք՝ «Մենք չենք քննարկել «տարածքներ՝ խաղաղության դիմաց» թեզը», կամ «ԵՄ-ն դրական է վերաբերվում Հայաստանի հետ վիզային ռեժիմի ազատականացմանը»:
Կան պարզապես ծիծաղաշարժ կետեր, օրինակ՝ «Փակվել է ֆեյսբուքյան «Դուխով Հայաստան» Էջը», կամ «Խնայում ենք բնությունը, հանրային միջոցները, մեր աչքերը, վարչապետի աշխատակազմն անցնում է թվային թղթի»:
Չես հասկանում՝ ինչ է մտածել ցանկը կազմողը, երբ պարգևավճարների աղմուկից հետո գրել է. «Կադաստրի բոլոր աշխատակիցներն ամեն ամիս աշխատավարձի 25 տոկոսի չափով խրախուսում են ստացել»: Կարելի էր անգամ ենթադրել, որ այս ցանկը «հակառակորդ» թիմն է կազմել՝ նոր իշխանություններին վարկաբեկելու և նրանց անգործությունն ի ցույց դնելու համար, եթե այս կետերը տեղադրված չլինեին «Քաղպայմանագրի» վարչության անդամ Լենա Նազարյանի ֆեյսբուքյան էջում:
Եթե մտքի, վերլուծության դեֆիցիտ կա նոր իշխանության շրջանում, կարող էին պարզապես խնդրել, և մենք ավելի խելամիտ ու համոզիչ ցանկ կկազմեինք այս ամիսներին տեղի ունեցած դրական փոփոխությունների վերաբերյալ:
Ասենք, օրինակ, առաջին կետում կգրեինք արդար, թափանցիկ ընտրությունների կազմակերպման փաստը, որը հեղափոխության ամենամեծ ձեռքբերումն է: Երկրորդում կգրեինք քրեաօլիգարխիկ կլանների վերացումը կամ գոնե պասիվացումը:
Ակնհայտ է, որ հայաստանյան իրականությունը ձևավորող նախկին կլաններն այսօր այլևս դերակատար չեն»:
Նյութն ամբողջությամբ կարդացեք թերթի այսօրվա համարում: