Խմորիչով պատրաստվող խմորներով կարելի է անվերջ փորձարկումներ անել, բայց եթե իսկապես օդային փափկության թխվածք եք ցանկանում, առաջարկում ենք ձեզ դիմել ճապոնական հացթուխներին։ Ամպի նման օդային «Հոկայդո» բուլկիները սիրված և ընդունված են ամբողջ Ասիայում։ Դրանց գաղտնիքը «տանջոնգ» կոչվող տեխնիկայի մեջ է։
Անհրաժեշտ բաղադրիչներ
- Կաթ – 260 մլ
- Շաքար – 6 ճ/գ
- Ձու – 2 հատ
- Կարագ –3 ճ/գ
- Ալյուր – 370 գ
- Չոր խմորիչ – 7 գ
- Աղ – 1 թ/գ
- Դարչին – 0.5 թ/գ
Պատրաստման եղանակը
1. Սկզբի համար պատրաստենք «տանջոնգը»։ Դրա համար խառնում ենք 100 մլ կաթը և 20 գ ալյուրը հարմար ամանի մեջ և միջին կրակի վրա պահում մոտ երեք րոպե՝ անընդհատ խառնելով։
2. Խմորիչը խառնում ենք մնացած կաթի և 2 ճ/գ շաքարի հետ և թողնում ենք՝ հասունանա մոտ 10-15 րոպե։
3. Մաղով անցկացնում ենք մնացած ալյուրը, ավելացնում ենք աղը և խառնում։ Կոտրում ենք սենյակային ջերմաստիճանի ձուն, լցնում ենք խմորիչով կաթը և սառած եփված կաթի և ալյուրի խառնուրդը։
4. Խմորը հարիչով մոտ հինգ րոպե հարեք։ Ավելացրեք 1 ճ/գ փափուկ կարագը և հունցեք։ Պետք է էլաստիկ և ձեռքերին չկպչող խմոր դառնա։
5. Թողեք՝ հանգստանա կարագապատ թասի մեջ, սննդային թաղանթի տակ մոտ մեկ ու կես ժամ։ Խմորը պետք է երկու անգամ մեծանա։
6. Դարչինը խառնեք շաքարի հետ և հալեցրեք 2 ճ/գ կարագը։
7. Հանեք խմորը, սեղանի վրա հավասարաչափ տարածեք, որ հաստ լոշիկ ստացվի։ Կտրեք այն 8 հավասար մասերի և ամեն մեկից գնդիկ սարքեք։
8. Գնդերից յուրաքանչյուրն օվալի վերածեք։ Կարագ քսեք, շաքարով դարչինի խառնուրդը ցանեք վրան և փաթաթեք հետևյալ կերպ. սկզբում կողքի մասերը ներս սեղմեք, գրտնակով վրայից անցեք, իսկ հետո ռուլետի պես փաթաթեք։
9. Ապահովության համար կարը կարելի է կպցնել։ Շարեք պերգամենտի թղթի վրա, ծածկեք թաղանթով և թողեք՝ հանգստանա ևս մեկ ժամ տաք տեղում։
10. Երբ բարձրանան, ձու քսեք և 190 աստիճան տաքացված ջեռոցը դրեք 20 րոպեով։
11. Հենց որ պատրաստ լինեն, հանեք ձևամանի միջից և տեղավորեք ցանցի վրա առանց պերգամենտի թղթի, որպեսզի սառչեն։
