- Բոլոր բաղադրիչները պետք է սենյակային ջերմաստիճանի լինեն (պատրաստելուց 60-90 րոպե առաջ սառնարանից պետք է նախապես հանել)։
- Ձվի թարմությունը որոշելու համար պետք է այն ընկղմել ջրով լի բաժակի մեջ. եթե ձուն սուզվում է բաժակի հատակը, նշանակում է՝ թարմ է, և հակառակը։
- Բաղադրատոմսերի մեջ buttermilk ասվածը կարելի է փոխարինել 1 բաժակ կաթի մեջ 1 թ/գ քացախի խառնուրդով։
- Բաղադրիչների ճիշտ քանակությունը որոշելու ամենաճիշտ տարբերակն էլեկտրոնային կշեռքն է։
- Մեկ ձուն միջինը կշռում է 37-40 գրամ, որից 20-ը մոտավորապես դեղնուցն է։ Ձուն ավելի լավ է առանձնանում, երբ սառած է լինում, իսկ հարելու համար ամենահարմարը տաք սպիտակուցներն են։
- Սպիտակուցները կարելի է սառեցնել սառցախցիկում (հերմետիկ փակված ամանի մեջ), իսկ օգտագործելուց 1 օր առաջ պետք է հանել այնտեղից։
- Վանիլինի փոխարեն ցանկալի է վանիլի էքստրակտ կամ էսենցիա օգտագործել։
- Ձվերը սենյակային ջերմաստիճանի դարձնելու համար անհրաժեշտ է դրանք պարզապես տաք ջրով լի բաժակի մեջ ընկղմել։
- Կարագը սենյակային ջերմաստիճանի բերելու համար պետք է մանր-մանր կտրատել և դնել ափսեի մեջ։
- Ցանկացած բաղադրատոմսում մուգ շոկոլադը կարելի է փոխարինել կաթնայինով և հակառակը։
- Եթե բաղադրատոմսում կարագի կողքին ոչ մի նշում չկա, միշտ օգտագործեք ոչ աղի սերուցքային կարագ։
Կարևոր խորհուրդներ թխվածքներ պատրաստելիս
Բաղադրիչների խառնելու ընթացքը
- Չոր բաղադրիչները ցանկալի է լավ խառնել նախքան հեղուկ բաղադրիչներին ավելացնելը:
- Շաքարավազն ու կարագը հարելիս պետք չէ ծուլանալ։ Իդեալական տարբերակում պետք է ստանալ սպիտակ թեթև զանգված, որի համար հարկավոր է հարել այն 5-8 րոպե։
- Երբ չոր բաղադրիչները հեղուկ բաղադրիչների հետ եք խառնում, առաջինը պետք է չոր բաղադրիչները լցնել։
- Խմորի կամ չոր բաղադրիչների վրա ձուն կոտրելուց հետո պետք չէ զանգվածը շատ խառնել: Պարզապես պետք է հարել մինչև համասեռ զանգվածի ստանալը:
- Շաքարավազը լցնելիս պետք է զգույշ լինել. շատ շաքարավազի դեպքում թխվածքի վրա մուգ կեղև է առաջանում, իսկ քիչ շաքարավազի դեպքում կեղևը բաց գույնի է լինում, խմորը` ձիգ։
- Պետք չէ ալյուրի չափաքանակը չարաշահել, քանի որ շատ ալյուրի դեպքում խմորի վերևում ճաքեր են առաջանում։
- Ձվի դեղնուցները խմորի մեջ գցելուց առաջ ցանկալի է դրանք առանձին հարել բաժակում:
- Եթե մեկ պտղունց աղը քաղցր խմորի մեջ գցենք, այն ավելի կուժեղացնի մյուս բաղադրիչների բույրը։
- Սպիտակուցային զանգվածը խմորին ավելացնելիս պետք է շատ զգույշ խառնել՝ վերևից ներքև շարժումներով:
- Մերենգայի համար սպիտակուցները հարելիս պետք է տվյալ ամանը մաքրել մի քանի կաթիլ կիտրոնահյութով կամ քացախով թրջված անձեռոցիկով։
- Եթե խմորի մեջ տարբեր բուրավետիչներ ենք ավելացնում, ավելի լավ է սկսել վանիլինից, քանի որ այն ուժեղացնում է այլ բուրավետիչների համը։
Կարևոր խորհուրդներ, որոնք պետք է հաշվի առնել խմորեղեն թխելիս
- Եթե պատրաստում եք բազմաշերտ խմորեղեն, ավելի լավ է խմորը բաժանել հավասար մասերի և առանձին թխել ամեն շերտը:
- Խմորը ձևամանի մեջ լցնելուց հետո պետք է դանակով հավասարեցնել այն։
- Խմորը պետք է լցնել ձևամանի մեջ 1/2-2/3-ի չափից ոչ ավել։
- Թխվածքներ պատրաստելիս ավելի լավ է առաջնորդվել ջեռոցի առանձնահատկություններով և ինքնուրույն կարգավորել բաղադրատոմսում նշված ջերմաստիճանը։
- Միշտ պետք է սպասել, որ ջերմաստիճանը ջեռոցում անհրաժեշտ աստիճանի հասնի, հետո նոր թխել խմորեղենը։
- Խմորով լի ձևամանը պետք է աշխատել ջեռոցի մեջտեղի հատվածում դնել (եթե մի քանի ձևամաններով ենք թխում, որքան հնարավոր է, եզրերից հեռու)։
- Որպեսզի տորթը հավասար թխվի, 20 րոպեից (բայց ոչ շուտ) ձևամանը պտտում ենք հակառակ կողմի վրա (իհարկե, սա չի վերաբերում բիսկվիթային խմորներին):
- Խմորեղենը հարկավոր է միշտ թխել ջեռոցի մեջտեղի դարակում, եթե բաղադրատոմսում հատուկ նշված չէ կոնկրետ դարակը:
- Սովորաբար թխվածքի պատրաստ լինելը կարելի է զգալ խոհանոցում տարածված բույրով։
- Եթե ուզում ենք լուցկու օգնությամբ (եթե լուցկին չոր է դուրս գալիս, ուրեմն՝ խմորեղենը պատրաստ է) փորձել տորթը պատրաստ է, թե ոչ, ապա պետք չէ տորթը ջեռոցից ամբողջովին հանել։ Կարելի է զգուշությամբ մի փոքր բացել ջեռոցի դուռը և շատ արագ ստուգել թխվածքի պատրաստ լինելը:
- Կարկանդակը ջեռոցում պետք չէ երկար թխել, քանի որ այն ավելի չոր է դառնում։
Ինչպես ճիշտ սառեցնել թխվածքը և պատել կրեմով
- Ցանկալի է թխվածքը ջեռոցում ցանցի վրա 10 րոպե թողնել, հետո նոր հանել ջեռոցից։
- Քափքեյքերը պետք է անմիջապես ձևամանից հանել, այնուհետև դնել ցանցի վրա, որ սառչեն։
- Կտրատելուց կամ կրեմ քսելուց առաջ թխվածքի սառած շերտերն անհրաժեշտ է սննդային փաթեթով փաթաթել և 30 րոպեով տեղափոխել սառցախցիկը։
- Կրեմը քսելուց առաջ սիլիկոնե փուզայով անհրաժեշտ է տորթի վրայից բոլոր փշրանքները մաքրել։
- Որպեսզի թխվածքի շերտերի միջև կրեմը հավասար չափով լցվի, անհրաժեշտ է կլոր անցքերով հրուշակեղենային պարկերի մեջ լցնել այն, ապա զոլերով լցնել խմորի վրա:
- Կրեմը սկզբում հարկավոր է քսել բարակ շերտով` բոլոր մասերը ֆիքսելով։ Այնուհետև դնել սառանարանը 30 րոպեով, հետո քսել կրեմի մնացած մասը (սա կոչվում է breadcrumbs coating)։
- Եթե տորթը կրեմով պատելու ժամանակ չունեք, կարող եք շաքարի փոշի կամ կակաո ցանել․ դրանք հրաշքներ են գործում։
- Եթե ուզում եք, որ տորթն ավելի փայլուն լինի, մատուցելուց առաջ զգուշորեն ֆենով տաք օդ փչեք տորթի վրա։
Նյութի աղբյուր՝ https://www.cooks.am/interest/
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print
Տպել