Արամ Խաչատրյան համերգասրահում երեկ կայացավ հաշմանդամություն ունեցող անձանց «Էխո» իրավապաշտպան կազմակերպության տարվա ամփոփիչ գալա համերգը, որով էլ եզրափակվեց հանրային իրազեկման քարոզարշավը՝ նվիրված հաշմանդամություն ունեցող անձանց իրավունքներին։ «Չանտեսելով ոչ ոքի» խորագրով երեկոն համախմբել էր սիրված և ճանաչված երգիչ-երգչուհիներ Մաշա Մնջոյանին, Արսեն Գրիգորյանին, Նառային, Եվա Եգանյանին, Գրիգոր Միրզոյանին, Մասիս Հունանյանին, Շուշան Տոնոյանին, Էրիկ Զաքյանին և այլոց։
Երեկոյի ընթացքում հայ էստրադային և ժողովրդական երգիչների հետ ելույթ ունենցան նաև հաշմանդամություն ունեցող երգիչներ և երգչախմբեր։ Իրենց կատարումով հանդիսատեսին անմոռանալի պահեր պարգևեց Լսողության խնդիրներ ունեցող երեխաների կրթահամալիրի երգչախումբը։ Արտիստներից յուրաքանչյուրը երկուական երգ կատարեց: Հանդիսատեսի շարքում այս անգամ մեծահասակներից շատ երեխաներ էին: Համերգի նպատակն էր մեկ անգամ ևս հասարակության ուշադրությունը հրավիրել հաշմանդամություն ունեցող անձանց հիմնախնդիրներին և հնարավորություն ստեղծել զարգացնելու նրանց կարողությունները։ BlogNews.am-ը ներկա է եղել համերգին ու ֆիքսել ամենահետաքրքիր դրվագները։