Էյֆորիզմից ու դեպրեսիվիզմից մի պահ կտրվենք ու նայենք հարցին ավելի ակադեմիական ու սառնասիրտ տեսանկյունից։
ՀՀԿ+ՀՅԴ հավաքել են շուրջ 100․000 ձայն, իսկ մյուս կողմից՝ «Իմ քայլի», իսկ ավելի ճիշտ կլինի ասել Նիկոլի ռեյթինգը ապրիլ-մայիսյան 95+ տոկոսից և Երևանի ավագանու 80+ տոկոսից հետո իջել է 70-ի։
Վստահ էի ու վստահ եմ, որ էդ անկման դինամիկան շարունակվելու է, իսկ ներքաղաքական ու արտաքին քաղաքական անցանկալի զարգացումների դեպքում արագանալու է, ինչում, ի դեպ, չի կարող շահագրգռված չլինել պետության համար սրտացավ ոչ ոք։ Ասել է թե՝ ինչքան վատ, էնքան լավ մոտեցումը Նիկոլի ռեյթինգի ու սեփական հնարավորությունների մասով հակապետական է։
Մյուս իրողությունն այն է, որ խորհրդարան չի անցել անգամ նոմինալ ազգային-պահպանողական սպեկտորին պատկանող ոչ մի ուժ, իսկ որ այդպիսի սպեկտորի պահանջարկ կա, վկայում է արդեն իսկ ՀՀԿ+ՀՅԴ 9 տոկոսը, որը աճի տենդենց ունի։
Առաջացած վակուումը երկար դատարկ չի մնալու, ողջ հարցն այն է, թե ովքեր են այն լրացնելու և որքան են հաջողելու «Իմ քայլի», իսկ իրականում՝ Նիկոլի աստիճանաբար նվազող ռեյթինգի արտահոսքը դեպի իրենց ուղղել ու հարցում։ Գուշակություններ անել չեմ ուզում, որովհետև դա խիստ անշնորհակալ գործ է։ Կարող է լինել այնպես, որ այդ դրոշակը վերցնեն ու տանեն նույն ՀՅԴ-ն ու ինքնամաքրման ու վերաիմաստավորման փուլն ավարտած ՀՀԿ-ն, դա կարող են լինել լրիվ նոր ուժեր, կարող է լինել նաև այնպես, որ բոլոր նշվածների լայն դաշինքի ականատես լինենք, բայց որ Հայաստանի ներքաղաքական դաշտն առանց ընդդիմության չի մնալու, ու այդ նոր ընդդիմությունը հենց ազգային-պահպանողական սպեկտորից է լինելու՝ կասկած չունեմ։
Ինչ վերաբերում է նոր պառլամենտական ուժերին, ապա չեմ զարմանա, որ արդեն շուտով քիչ թե շատ արժանահավատ բեմականացում լինի, որի արդյունքում «Իմ քայլի» 88 հոգանոց ֆրակցիան տրոհվի, ու սկսեն արմատական ընդդիմության բացակայությունը սուբլիմացնել плохой-хороший полицейский խաղարկելով։ ՀՀԿ-ի չանցնելը որոշակի դիսկոմֆորտ է ստեղծում դեմոնիզացիայի ու քավության նոխազի հարցում, բայց կարծում եմ, որ դրան էլ լուծում կգտնեն ու ՀՀԿ-ի փոխարեն աստիճանաբար կսկսեն թիրախավորել ԲՀԿ-ին։
Այնպես որ, սխալվում են նրանք, ովքեր համարում են, որ ամեն ինչ ավարտվեց։ Ամեն ինչ ճիշտ հակառակն է, ու իրական խաղը նոր է սկսվում։
