Aysor.am-ը գրում է.
Երևանի Կարեն Դեմիրճյանի անվան Մարզահամերգային համալիրի տնօրեն Վազգեն Ասատրյանի հետ պայմանագիրը չի երկարաձգվի, դա պետական գույքի կառավարման կոմիտեի նախագահ Նարեկ Բաբայանի որոշումն է, ինչը նա պայմանավորել է համալիրում չարաշահումների, ռիսկերի կասկածների հետ:
Aysor.am-ի հետ զրույցում Վազգեն Ասատրյանը հիշեցրեց՝ իր պայմանագրի ժամկետը լրացել էր դեռևս հուլիսի 1-ին, հենց այդ ժամանակ էլ կարգադրություն ստացավ ազատել տարածքը: Սակայն վերջին պահին, հաշվի առնելով այն հանգամանքը, որ առջևում Ֆրանկոֆոնիայի գագաթնաժողովն էր, իրեն հետ կանչեցին ու պայմանագիրը երկարացրեցին 5 ամսով:
«Բնականաբար, ես այդ աշխատանքների մեջ ներառված էի, ձմեռվանից դրանով էի զբաղվում: Ֆրանկոֆոնիան անթերի, բարձր մակարդակով անցավ, ինչը Հայաստանի համար պատիվ էր: Մենք մեր պարտականությունը գերազանց կատարեցինք, բոլորը հիացած էին… Ինձ «օգտագործեցին» ու հրաժեշտ տվեցին, պայմանագիրս վերջացավ, էլ չեն երկարացնում: Ինչ վերաբերում է չարաշահումներին՝ սուտ են, հորինված բամբասանքներ, որոնք, պարզ է, որևէ ապացույց չունեն: Դա ուղղակի պատճառաբանություն է: Նարեկ Բաբայանն ասել է, թե պահակային ծառայությունն իրականացվում է 15 աշխատակցի կողմից, սակայն 24 աշխատողի համար է մրցույթ եղել, և համալիրը ծախս է կատարում 24 աշխատողի համար: Բայց մենք դրա հետ ի՞նչ կապ ունենք: Մենք ժամանակին մրցույթ ենք հայտարարել, որտեղ 24 հոգի են եղել՝ 15 հոգին պետք է լիներ շենքում, ու միշտ լինում էր, մյուսները՝ շրջիկ՝ համալիրի տարբեր տարածքներում: Բնականաբար, 15-ին ես միշտ տեսնում էի, դրսի տղաներն էլ իրենց գործը նորմալ էին անում, բայց հո ամեն անգամ չէ՞ի գնալու հաշվելու, հո այստեղ գաղութ չի՞: Պահակային ծառայություն իրականացնող ֆիրման իր պարտականությունը կատարել է: Այս տարվա ամռանը, երբ Երկրապահի հետ կապված բացահայտումներ եղան, նրանց բոլոր պայմանագրերը դադարեցվեցին, քանի որ այդ ընկերությունը ևս Երկրապահին էր պատկանում: Մենք էլ դիմեցինք իրավաբաններին, դիմեցինք Պետգույք, Համալիրի իրավաբանները զբաղվում էին, որպեսզի մենք էլ դադարեցնենք իրենց հետ համագործակցությունը: Բայց իրենց կողմից որևէ խախտում չկար, մեզ հետ շատ բարեխիղճ ու նորմալ, առանց միջադեպի աշխատել են: Իսկ թե 15 աշխատակից են օգտագործել, թե 24՝ իրենց խնդիրն է, մենք ի՞նչ կապ ունենք, կարևորը՝ մեր տարածքը լավ է հսկվել, ոչինչ չի փչացել, չի կոտրվել ու չի կորել», - մանրամասնեց Վազգեն Ասատրյանը:
Շարունակությունը կարող եք կարդալ այստեղ
