168.am-ը գրում է.
ՀՀԿ-ական Արտակ Զաքարյանը ռեյտինգային ընտրակարգով առաջադրվել է Երևանում, թիվ 2 ընտրատարածքում:
«Իշխանափոխությունից հետո տեղի ունեցող զարգացումներն առաջ բերեցին մի շարք խնդիրներ նոր իշխանության կողմից: Սրա արդյունքում՝ ցանկացած կայացած քաղաքական գործիչ իրեն հարց կտար. եթե չմասնակցենք ընտրություններին, կարո՞ղ ենք հետագայում ինքներս մեզ ապացուցել, որ ընտրություններին չմասնակցելը ճիշտ էր: Արդար չէր լինի զերծ մնալ քաղաքական գործընթացներից ու ասել՝ թող գնան, ինչ ուզում են՝ անեն: Քիչ չեն մարդիկ, ովքեր նույնպես ոգևորված են փոփոխություններից, բայց ունեն մտահոգություններ: Փոփոխությունները պետք է երաշխավորված լինեն, ոչ թե վտանգված: Ընտրություններին ՀՀԿ մասնակցությունը կշռադատված է, չնայած եղել են նաև չմասնակցելու, դադար վերցնելու առաջարկներ:
Մենք առանձնացրել ենք այն խնդիրները, որոնք լինելու են մեր ուշադրության կենտրոնում: Դրանցից մեկն Արցախի հիմնախնդիրն է: Արցախյան խաղաղ կարգավորման բանակցային գործընթացն ունի որոշակի տրամաբանություն, որը երկար տարիներ իրեն արդարացրել է՝ հատկապես ստատուս-քվոյի պահպանման գործընթացում: Չի բացառվում, որ առաջիկայում իշխանության նկատմամբ ճնշումներ լինեն, մենք լինելով խորհրդարանում՝ օգնելու ենք, որ զերծ մնան դրանցից:
Կա նաև անվտնագության հարցը: Այս առումով շատ ասելիք ու անելիք ունենք՝ ելնելով մեր փորձից: Հաջորդ իշխանություններին կօգնենք ճիշտ ճանապարհներ, լուծումներ գտնել՝ հավասարակշռելով տարածաշրջանային ուժերի կառուցվածքը: Վտանգված է նաև արժեքային համակարգը: Որոշակի հոսանքներ, խմբեր հայկական ավանդական պատկերացումներին, ընտանիքի մոդելին, եկեղեցու դեմ որոշակի ոտնձգություններ են կատարում: Որպես ազգային պահպանողական ուժ՝ այս առումով ևս խորհրդարանում ունենք անելիք»,- լրագրողների հետ հանդիպման ժամանակ ասաց Արտակ Զաքարյանը:
Անդրադառնալով ՀԱՊԿ-ում ստեղծված իրավիճակին՝ Արտակ Զաքարյանը նշեց.
«ՀԱՊԿ-ում արդյունքները միշտ եղել են գոհացուցիչ, չնայած եղել են հակասություններ՝ պետությունների ներսում: Այսօր որդեգրված քաղաքականության արդյունքում տեսնում ենք, որ առկա տարբեր մոտեցումները կարող են վերածվել կոշտ հակասությունների, ինչն անդրադառնալու է ոչ միայն ՀԱՊԿ-ում, ԱՊՀ-ում, այլև ԵԱՏՄ-ում մեր հնարավորությունները սահմանափակելուն:
Չեմ բացառում, որ շատ խնդիրներ տեղափոխվեն ՄԱԿ-ի հարթակ: Իսկ այն, ինչ հայտարարվեց Բելառուսի կողմից, անընդունելի է, մեր իշխանությունները պետք է հասնեն նրան, որ ներողություն խնդրեն կամ վերանայեն իրենց մոտեցումները: Ճիշտ չէ փակ քննարկման արդյունքում տեղի ունեցածը ներկայացնել Ադրբեջանի դեսպանին, չնայած մեզ համար գաղտնիք չեն այդ երկու երկրների հարաբերությունները: Պետք է հնարավորություն ունենանք մինչև վերջ շարունակել ՀԱՊԿ գլխավոր քարտուղար ունենալու մեր իրավունքը: Քանի որ սխալի մեծ մասը մերն է, անհարկի շտապողականություն է եղել Խաչատուրովին հետ կանչելու առումով, հուսամ, որ իշխանությունները դասեր կքաղեն: Արտաքին քաղաքականությունը Հայաստանում հրապարակային ելույթ ունենալը չէ, այն քիչ խոսելու և շատ աշխատելու մեջ է»:
